A Xunta quere asinar con Endesa e o Goberno un plan "consensuado" cos transportistas de carbón das Pontes
O Goberno galego destaca o seu "máximo compromiso" para "manter o emprego" nas subcontratas de R Cable
Por E.P. | Compostela | 17/09/2019 | Actualizada ás 13:58
O director xeral de Enerxía e Minas, Anxo Bernardo Tahoces, explicou que tras reunións mantidas cos representantes dos transportistas de carbón da central térmica das Pontes (A Coruña), a Xunta acordou " unha folla de ruta" de forma que xa elevou "un documento oficial" que "fará valer" ante Endesa e o Ministerio para a Transición Ecolóxica.
Así o indicou na Comisión 6ª de Industria, Enerxía, Comercio e Turismo do Parlamento de Galicia este martes, un día despois de que centos de persoas mobilizásense na Coruña para esixir "garantías de emprego" para os traballadores da planta tras cinco meses de inactividade na mesma. Entre os asistentes atopábanse persoal de empresas auxiliares e transportistas, que se desprazaron ata a cidade herculina en 130 camións.
Neste contexto, Tahoces comprometeu que o Goberno galego traballará "arreo para que a central traballe absolutamente con normalidade" e "para que non se perda ningún emprego nin directo nin indirecto".
Ademais, o director xeral fixo súas as declaracións do alcalde das Pontes e presidente da Deputación da Coruña, o socialista Valentín González Formoso, quen no marco das protestas deste luns asegurou que "é un partido que se xoga fundamentalmente en Madrid".
Deste xeito respondeu o responsable de Enerxía e Minas da Xunta a unha pregunta da deputada do BNG Montse Prado, quen en sede parlamentaria trasladoulle a "profunda preocupación" dos nacionalistas pola "situación de incerteza" que xera o paro produtivo na planta de Endesa.
Diso serviuse para esgrimir que a Xunta "está instalada nunha actitude que só busca defender os intereses electorais do PP" e que "o que prima é ese 'pim pam pum'" co Goberno central que "en nada contribúe".
EMPREGO EN R CABLE
Por outra banda, na Comisión 6ª compareceu tamén a secretaria xeral de Emprego, Covadonga Toca, quen recalcou o "máximo compromiso" da Xunta para "manter o emprego" nas subcontratas de R Cable, con cuxos traballadores asegurou que "están en contacto desde o primeiro momento".
Así respondeu á deputada do PSdeG Begoña Rodríguez Rumbo, quen lembrou que esta situación se mantén desde 2015, cando a empresa vasca Euskatel adquiriu R e, a pesar de comprometerse "a dar continuidade" ao emprego, "a realidade é que desde o primeiro momento iniciou un proceso de deslocalización, fundamentalmente de servizos de mantemento, cara a Asturias e País Vasco". Iso podería afectar, segundo as súas cifras, a uns 1.000 postos de traballo.
Ao sinalar a socialista que a súa resposta era simplemente "politicamente correcta", a secretaria xeral de Emprego reiterou que están "de lado dos traballadores" e apelou a "ser responsables": "Non se poden adoptar solucións se non se coñece a situación e o contexto".
