A Xunta organizará o primeiro torneo galego de 'League of Legends'
Poderán participar un máximo de 32 equipos compostos por cinco mozos de 18 a 30 anos, ambos inclusive.
Por Europa Press / Redacción | SANTIAGO DE COMPOSTELA | 21/09/2019 | Actualizada ás 19:38
A Consellería de Política social da Xunta organizará o primeiro torneo a nivel autonómico do videoxogo 'League of Legends' --tamén coñecido como 'LOL'--, no que poderán participar un máximo de 32 equipos compostos por cinco mozos de 18 a 30 anos, ambos inclusive. O prazo de inscrición, que debe ser en liña, abriuse este sábado ás 16,00 horas.
A directora xeral de Xuventude, Participación e Voluntariado, Cristina Pichel, foi a encargada de presentar a iniciativa no Espazo Xove de Noia (A Coruña). Estivo acompañada por representantes da Asociación Xuvenil A Grotta, que se encargarán de xestionar o programa.
Segundo detallou a directora xeral, trátase dun proxecto "pioneiro en Galicia" e que terá lugar nos doce Espazos Xoves xestionados pola Administración autonómica. Tamén explicou que antes do inicio de cada competición organizarase unha acción formativa centrada no uso responsable dos videoxogos.
En cada encontro deste torneo participará un número de equipos que dependerá da poboación do municipio onde se sitúa cada Espazo Xove. Deste xeito, nos concellos con máis habitantes poderá haber ata un máximo de catro, mentres que na de menos poboación a competición será entre dous equipos. Cada formación estará composta por cinco mozos --ademais doutros tantos suplentes--, dos cales un actuará como capitán.
Tras esta fase inicial, os 16 equipos clasificados acudirán a unha fase final, cuxa data e lugar de celebración será determinado proximamente pola Dirección Xeral de Xuventude, Participación e Voluntariado. Iso si, terá lugar en fin de semana e os gastos de mantemento e aloxamento correrán a cargo da Xunta.
As inscricións poderanse rexistrar ata tres días antes do inicio da competición en cada Espazo Xove e realizaranse a través do formulario correspondente na web de Xuventude. A persoa que actúe como capitán do equipo deberá cubrilo achegando o DNI dos demais membros do grupo.
