Veciños de Teo denuncian o inicio de obras en Casalonga co baleirado da lagoa

A plataforma Casalonga Limpa de Resiudos denuncia que comezou o baleirado da lagoa situada nos terreos da antiga canteira en Teo. Segundo comunica a propia plataforma, este pasado luns as augas da lagoa estaban sendo conducidas a un regato que pasa polo lugar de Francos en dirección ao río Tinto. As testemuñas puxeron en coñecemento da Garda Civil este feito para trasladalo ao Seprona.

Segundo o comunicado da plataforma veciñal “a unidade da Garda Civil constatou que coa evacuación se estaba permitindo a baixada tanto das percas existentes na lagoa como das esporas da herba da pampa”. As accións de baleirado estanse a realizar con “maquinaria que excede a limitación de 4,5 tn da pista”. Deste xeito, a plataforma solicita colaboración veciñal para conseguir “fotos de calquera maquinaria ou camión que alí se atope e facelas chegar á plataforma a través das diferentes redes sociais, coa intención de denunciar este feito”.

Xunto a isto, desde Casalonga Limpa de Residuos alertan que as accións e obras executadas na antiga canteira, non deberían estarse realizando pois existe un expediente de caducidade xa iniciado, ademais de sinalar que a empresa executora non ten plan de restauración para o lugar. Por iso acusan á Dirección Xeral de Minas de gardar silencio ante as solicitudes enviadas pola plataforma e o Concello. Engaden tamén que non se está cumprindo co plan de seguridade da empresa entregado a Minas.

Por último, sinalan que “despois de que se conseguira parar tanto o proxecto da planta de biogás como o primeiro plan de restauración”, o proceso está esperando que a Dirección Xeral de Minas “faga unha proposta de resolución, tendo en conta as máis de mil alegacións xa feitas pola veciñanza á declaración de impacto ambiental solicitada pola empresa”. Anuncian que esta proposta virá acompañada dun novo período de alegacións públicas.