Investigado por colocar lazos en leiras de millo para evitar as desfeitas do xabarín

A Garda Civil investiga a un veciño da Laracha como presunto autor dun delito contra a fauna e a flora, pola colocación de lazos non selectivos nunhas leiras agrícolas, para impedir danos nas plantacións de millo.

Segundo informaron fontes da Comandancia, as dilixencias abríronse por mor de varios incidentes ocorridos nos últimos meses. Así, o pasado 14 de agosto, un veciño da Laracha denunciou que o seu can quedou atrapado nun lazo mentres paseaban por unha leira. O animal tivo que ser atendido nunha clínica veterinaria debido ás lesións sufridas.

A finais de outubro volveuse a denunciar outro incidente similar, noutra leira próxima á primeira, onde outro can quedou atrapado por un lazo. Nese caso, o animal puido ser liberado polo seu dono sen sufrir danos físicos. O pasado 4 de novembro, axentes do Seprona realizaron unha inspección nesa leira e localizaron e retiraron outros dous lazos instalados en puntos estratéxicos de paso de fauna salvaxe.

As pescudas permitiron identificar ao responsable da colocación desas trampas, que accedeu a mostrar aos axentes os lugares exactos onde colocara os lazos, compostos cables metálicos e mosquetóns. Este tipo de lazos están prohibidos debido ao seu carácter non selectivo, porque supoñen un grave risco para a fauna salvaxe e para os animais domésticos.

Segundo recoñeceu o home investigado, colocara os lazos debido aos danos causados por fauna salvaxe, como os jabalíes, nos cultivos de millo desas leiras.

Investigado un veciño da Laracha pola colocación de lazos non selectivos en varias plantacións de millo.. GARDA CIVIL | Fonte: Europa Press