Solicitan seis anos de prisión para un excontable da confraría do Grove por apropiarse de fondos

O Ministerio Público solicita seis anos de prisión e 15 de inhabilitación para un excontable da confraría de pescadores San Martiño, do Grove, por malversación de caudais públicos, xa que está acusado de apropiarse de fondos do colectivo.

O xuízo deste caso, que procede do Xulgado de Instrución número 1 de Cambados, celebrarase a partir do próximo luns 18 na sección segunda da Audiencia Provincial de Pontevedra.

No seu escrito, o fiscal relata como "o acusado, obrando con ánimo de ilícito enriquecemento, faltando ao deber de lealdade para coa confraría e aproveitando a circunstancia de ter acceso ás caixas e contas bancarias da entidade pola súa condición de encargado da área económica, concibiu o plan de ir facendo súas paulatinamente diversas cantidades de euros durante os anos 2009 e 2010, logrando incorporar ao seu patrimonio un total de 505.515,83 euros".

Así, conta que retirou distintas cantidades de dúas contas do depósito e engade que fixo seus un total de 212.050,83 euros procedentes da recadación por vendas da pescadería da confraría durante os anos 2009 e 2010.

O acusado, segundo prosegue Fiscalía, estaba afectado do trastorno do control de impulsos coñecido como ludopatía. Debido a este trastorno psicolóxico, "gastou no Casino de La Toja un total de 47.400 euros entre os días 7 de marzo de 2009 e 7 de abril de 2010".

Como consecuencia das súas operacións, a confraría "púxose nunha delicada situación económica e falta de liquidez, de tal sorte que non puido abonar á Consellería de Facenda a taxa derivada das vendas en lonxa durante o período 2009-2010, de maneira que se lle impuxo unha recarga por moura e intereses" por un valor total de 78.765,56 euros.

Neste contexto, o acusado tivo coñecemento (en setembro de 2009) de que na confraría "xa descubriran ese mes que el era o autor de varias transferencias desde as contas corporativas á súa propia conta bancaria, motivo polo cal pediu unha baixa por depresión".

Fíxoo, segundo o fiscal, "antes de que se iniciase contra el un procedemento xudicial por estes feitos". "Confesou o día 1 de novembro de 2011 ante o Xulgado de Instrución número 1 dos de Cambados, en funcións de garda, apropiarse duns 190.000 euros da confraría", conclúe.

Para o Ministerio Público, os feitos constitúen un delito continuado de malversación de caudais públicos, co "agravante de abuso de confianza", pero a "circunstancia atenuante analóxica de confesión do feito" e tamén de alteración psíquica por ludopatía.

En calquera caso, e ademais das correspondentes indemnizacións, establece que responde o acusado do delito en concepto de autor e as entidades (Banco Santander e Caixabank) en concepto de responsables civís subsidiarios.

Audiencia Provincial de Pontevedra.