A Cámara despide cun aplauso unánime a Leiceaga, que levará as "demandas" de Galicia ao Senado

Un sonoro aplauso uniu a todos os deputados da Cámara galega para render homenaxe ao ata agora portavoz parlamentario do PSdeG, Xoaquín Fernández Lecieaga, con motivo da súa marcha para ostentar a responsabilidade de senador por designación autonómica.

Ao termino da sesión plenaria deste mércores, os portavoces dos distintos grupos e o propio presidente do Lexislativo galego, Miguel Santalices, pronunciaron unhas palabras para destacar a traxectoria de Leiceaga e desexarlle sorte na súa nova etapa na Cámara alta.

"Grazas por demostrar que defender os intereses lexítimos dun grupo non é incompatible co rigor e a predisposición para chegar a acordos", agradeceulle Santalices, que recoñeceu a "lealdade" dun deputado "institucional" que "sempre puxo por encima de todo" o Parlamento de Galicia.

Nesta liña, o portavoz parlamentario do PPdeG, Pedro Puy, referiuse aos "caprichos da vida" para lembrar os moitos ámbitos nos que el e Leiceaga estiveron "xuntos", desde as aulas da facultade ao "mar de Noia" ou os "campos de deporte". "Non despido a un amigo, despido a un rival que pecha unha etapa no Parlamento de Galicia", sinalou Puy, que expresou que o socialista "honrou" a Cámara galega por exercer a oposición de forma obxectiva e "con intelixencia", así como con "unha dialéctica que resultou inspiradora para os seus rivais".

"Por iso, debe constar o respecto que o PP lle ten, así como o desexo compartido de que vostede siga facendo o que fai no Senado, porque será moi bo para Galicia", augurou.

"ESTARÁ ONDE QUEIRA ESTAR"

Na súa intervención, o secretario xeral do PSdeG, Gonzalo Caballero, puxo en valor a "arte da política" feito por 'Xocas' ao longo da súa traxectoria e puxo en valor o seu compromiso e o seu "servizo" a Galicia.

"Non é unha despedida, cambia de lugar e espazo para seguir sendo unha parte fundamental do noso traballo político", expresou o político vigués, que volveu a deixar claro que "Leiceaga estará onde queira estar".

"Considera que debe estar noutro lugar", expresou Caballero, que lembrou que esta xa é "a segunda etapa" de Leiceaga no Parlamento de Galicia. "E non hai dous sen tres", advertiu.

"UNHA DAS PERSOAS MÁIS CUALIFICADAS"

Pola súa banda, tamén lembrou os tempos da facultade o parlamentario do Grupo Común da Esquerda Manuel Lago, aulas ás que chegou "un pipiolo" Leiceaga cando el xa era un "veterano". "Creo que o Parlamento de Galicia perde a unha das persoas máis cualificadas que temos, un dos mellores economistas e un dos mellores políticos que ten este país", subliñou. Tras iso, augurou que o socialista será "un senador estupendo representando as ideas progresistas deste país". "Sen dúbida, ímolo a botar de menos", indicou.

"NOVA ETAPA"

Na súa quenda de palabra, a líder dos nacionalistas galegos, Ana Pontón, considerou que a marcha de Leiceaga non se trata dunha "despedida" da política senón dunha "nova etapa". "Imos perder a un deputado que sempre defendía con moita paixón as súas ideas", indicou para asegurar que os "encontros e desencontros" con el permitían ao interlocutor "enriquecerse".

Pola súa banda, o portavoz de En Marea asegurou despedir "máis a un amigo que a un adversario" ao que deu as grazas polo moito que lle permitiu aprender sobre a economía pública de Galicia.

"EMOCIONADO"

O propio Leiceaga, que recoñeceu sentirse "emocionado" ante esta homenaxe, agradeceu o recoñecemento dos seus compañeiros tras "dez anos" en distintas etapas do Parlamento de Galicia, institución que definiu como "unha parte moi importante" da súa vida. O socialista comprometeuse a "estar pendente e tentar levar" ao Senado todas as "demandas" e reivindicacións que se fagan desde a Cámara galega, "sempre defendendo a liña" do seu partido.