Sanidade insiste en que o peche do paritorio de Verín é unha decisión "responsable"

O conselleiro de Sanidade, Jesús Vázquez Almuiña, asegurou que o peche do servizo de paritorio do Hospital comarcal de Verín, en Ourense, é unha decisión "difícil" pero "responsable", na que prima "a seguridade" dos nenos e nenas e das nais.

Así se pronunciou o titular de Sanidade este mércores en resposta a unha interpelación e dúas preguntas formuladas por Común da Esquerda, PSdeG e En Marea, quen cargaron contra a supresión do servizo, que atribúen a unha "decisión política", e avisaron de futuros recortes noutros hospitais comarcais.

"Priorizamos a seguridade das nais e dos neonatos sobre as críticas que estamos a recibir", asegurou o conselleiro, que se referiu ao descenso da natalidade na comarca de Monterrei. "Pasou dos 147 partos en 2010 a uns 60 este ano, o que supón unha diminución de case o 60%", indicou.

A iso engadiu que os partos, na actualidade, son "máis complexos", debido a causas como a "maior idade das nais e as xestacións múltiples", entre outras. "É un proceso natural pero non carente de riscos", manifestou. No seu discurso, tamén se referiu á "escaseza" de pediatras que afecta o conxunto do Sistema Nacional de Saúde e lembrou que, no caso do Hospital de Verín, quedaron sen cubrir dúas interinidades ao non presentarse ningún aspirante.

Ademais, atribuíu ao goberno bipartito que este centro careza de servizo de Pediatría desde "2006" e sinalou que "o único pediatra" --de Atención Primaria-- que realizaba gardas no hospital comarcal "deixou de facelas por razóns de idade".

"RESPALDO DOS PROFESIONAIS"

Con estes datos e "contando co respaldo" de 44 xinecólogos e obstetras da área sanitaria, sociedades científicas, do Colexio Médico de Ourense, asegurou que se decidiu trasladar unicamente o acto do parto ao Complexo Hospitalario Universitario de Ourense (CHUO).

"Preferimos tomar esta decisión antes de que teñamos que lamentar consecuencias irreversibles para unha muller e para o seu bebé", argumentou nun pleno no que considerou que "os mesmos que agora cuestionan unha decisión baseada en informes técnicos" criticarían á Xunta "se non tomase esta decisión".

CRÍTICAS EN BLOQUE DA OPOSICIÓN

En fronte, a deputada do Grupo Común da Esquerda, Eva Solla, aproveitou a súa interpelación ao titular de Sanidade para esixir a súa "dimisión" por demostrar que "a súa palabra non vale nada". Así, lembrou que o conselleiro "dixo que non ían substituír pediatras na provincia de Ourense porque non había, pero que estaban a facer un esforzo para buscalos". "Dúas semanas despois pecharon ese servizo e o paritorio de Verín", denunciou.

Pola súa banda, o socialista Julio Torrado denunciou a existencia dun "recorte de servizos programado e sistemático" nos hospitais comarcais que, na súa opinión, "ten o seu fundamento unicamente nun criterio, o diñeiro". "Non hai ningún outro criterio técnico que o motive", indicou.

Ademais, volveu censurar que a Xunta acuda á "política do medo" para xustificar a súa decisión e chegue a afirmar que os profesionais poden perder "pericia". "Ese desprezo levou a máis de 20.000 persoas á rúa o pasado sábado", indicou.

Pola súa banda, a deputada de En Marea Paula Vázquez Verao asegurou que hai "un clamor" en contra da decisión de Sanidade e criticou que sexa "máis fácil" cargar a decisión sobre "as mulleres" que "xestionar ben" os servizos.

TEMPOS DE ESPERA

No pleno, o titular de Sanidade deu resposta a outra pregunta formulada polo deputado de PP Aurelio Núñez Centeno sobre as listas de espera no Sergas. Respecto diso, Vázquez Almuiña, destacou que uns 85.200 pacientes beneficiáronse do decreto de garantías de tempos máximos de acceso ás prestacións sanitarias públicas desde a súa entrada en vigor en xaneiro de 2018.

O titular de Sanidade debullou estes datos en resposta a Aurelio Núñez Centeno, quen aproveitou a súa intervención para acusar os grupos da oposición de "mesturar e confundir" as cifras de espera, cando son as "mellores da serie histórica".

"Parece que todo serve para conseguir votos", censurou para instar En Marea, BNG, PSdeG, e Común da Esquerda a pedir tamén desculpas polos seus "insultos" aos cargos que foron investigados polo subministro de fármacos da Hepatite C despois de que se arquivase a causa.

Na súa intervención, o conselleiro asegurou que desde a posta en marcha do decreto de tempos máximos ata o 28 de novembro se realizaron "20.944 intervencións cirúrxicas de diagnósticos garantidos", "32.327 consultas de vías rápidas e cancro" e "31.929 probas diagnósticas de vías rápidas de cancro".

Almuiña, que asegurou que "toda esta actividade se realizou con recursos propios" do Sergas, lembrou que esta norma marca un prazo máximo de espera de 60 días naturais para as intervencións cirúrxicas programadas e non urxentes no caso dos cancros, patoloxía severa das válvulas cardíacas, aneurismas cerebrais, obstrucións arteriais graves, desprendemento de retina e hidrocefalia.

Así mesmo, indicou que establece un prazo máximo de espera de 45 días naturais para as primeiras consultas externas hospitalarias programadas e non urxentes das vías rápidas de cancro; e un prazo máximo de espera tamén de 45 días para as primeiras probas diagnósticas e/ou terapéuticas programas e non urxentes relacionadas coas vías rápidas de cancro.

O PERSOAL DO HOSPITAL INSTA A XUNTA A RECTIFICAR

Persoal do Hospital de Verín, que se desprazou este mércores a Santiago para seguir a intervención no pleno do conselleiro de Sanidade, insistiu en que a Xunta debe "rectificar" e censurou que os argumentos que emprega para xustificar o peche do paritorio "son falacias".

"Escoitamos unha bobada detrás doutra, o mesmo discurso de sempre", sinalou, en declaracións aos medios, Belén Vázquez, matrona do centro hospitalario de Verín, acompañada da súa compañeira Sara Campo, e do xinecólogo do hospital Javier Castrillo.

Sara Campo esgrimiu, a continuación, que "o persoal en xogo é o de menos". "O que nos preocupan son os dereitos fundamentais das nais e dos nenos que se están perdendo aquí, a parte doutros servizos porque están a desmantelar o hospital aos poucos. Ao final acabará sendo un ambulatorio de especialidades", esgrimiu.

En canto aos criterios de seguridade que aduce a Xunta, replicou que a atención que se presta en partos do hospital de Verín "réxese por todos os criterios de calidade e de recomendacións". Tamén incidiu en que os profesionais que avalan o peche de paritorio proceden todos "do hospital de referencia".

"Pero tamén está a saír xente doutros hospitais comarcais que avalan a nosa postura. E non hai ningunha evidencia científica, ningún informe técnico que avale que se poida quitar o pediatra de urxencias dunha comarca enteira. Iso non o din en ningún lado", aseverou.