A Xunta renovará a colaboración coas entidades galegas en Venezuela
O secretario xeral de Emigración traslada o "compromiso permanente" da Xunta coa colectividade nos momentos de incerteza que atravesa o país.
- A Xunta destaca que agora os galegos non emigran, senón que volven
- O executivo galego seguirá pedindo medidas para emigrantes retornados ao Goberno que saia das urnas
Por E.P. | SANTIAGO DE COMPOSTELA | 12/12/2019 | Actualizada ás 11:58
O secretario xeral de Emigración, Antonio Rodríguez Miranda, iniciou unha nova viaxe oficial a Venezuela co obxectivo de renovar a colaboración coas entidades galegas na atención e asesoramento á poboación galega residentes no país.
Diso informou a Xunta nun comunicado no que sinala que Rodríguez Miranda trasladará o "compromiso permanente" da Xunta coa colectividade nos momentos de incerteza que atravesa o país.
"Empezamos e terminamos o ano viaxando a Venezuela, o que dá idea da preocupante situación social que atravesa o país, que nos obriga a prestar maior atención se cabe á nosa colectividade", sinalou.
Neste sentido, o titular de Emigración reunirase este xoves cos responsables e socios da Federación de Centros Españois de Venezuela (Feceve) antes de manter, ata o vindeiro domingo, diversos encontros informativos sobre as axudas para o retorno da Xunta e os apoios á mocidade.
A Secretaria Xeral de Emigración quere dar resposta ás necesidades da poboación galega de Venezuela, que está a atravesar unha situación cada día máis complexa e grave. "É, por iso, o país no que a Xunta centrou os seus principais esforzos a través de investimentos tanto para residentes como retornados, que pasarán dos 2,2 millóns en 2018 a unha previsión de 3 millóns este ano", indicou.
