Sentidiño, a Palabra do Ano en Galicia

Sentidiño foi escollida Palabra do Ano 2019 en Galicia, tal e como o determinou a votación virtual pública promovida polo "Portal das Palabras", a web de divulgación do léxico galego da Real Academia Galega (RAG) e a Fundación Barrié.

Segundo informa a RAG, a segunda clasificada foi a palabra feminicidio e a terceira, narcosubmarino; mentres que as seguiron, por esta orde, quecemento global, ecocidio e negación, os outros termos que quedaran finalistas.

Sentidiño, unha das formas de denominar o sentido común, acaparou o 51 % dos votos emitidos; feminicidio o 20 %; narcosubmarino o 15 %; quecemento global un 8 %; ecocidio un 5 % e negación un 1 %.

A palabra gañadora deriva de sentido, que se orixina á súa vez da sustantivación do participio pasado do verbo sentir e a acepción do termo gañador refírese á capacidade mental de actuar de maneira razoable e correcta".

O aspecto "interesante", destaca a RAG, é o papel do sufixo derivativo "iño", que neste caso non outorga á nova palabra o matiz habitual de máis pequeno, senón o de "calidade de sensato", expresando con frecuencia tamén certa complicidade coa persoa coa que se fala. EFE