Galicia condena o primeiro crime machista do ano con concentracións por toda a xeografía

As principais institucións de Galicia expresaron a súa condena pola morte da veciña da Pastoriz Manuela Iglesias, de 79 anos de idade, a mans do seu marido e que supuxo o primeiro crime de violencia machista en Galicia en 2020 e o sexto en España.

Na mañá deste luns rexistráronse concentracións por toda a xeografía galega ante as sedes das principais institucións da comunidade como o Parlamento, o edificio administrativo de San Caetano (sede da Xunta en Santiago), a Delegación do Goberno (situada na Coruña) ou as deputacións provinciais e os consistorios do sete cidades.

Co presidente do Lexislativo galego, Miguel Ángel Santalices, á cabeza, deputados e traballadores da Cámara participaron nun minuto de silencio na escalinata de entrada ao Pazo do Hórreo ás 12,00 horas. Alí estiveron os portavoces de todas as forzas con presenza no Parlamento de Galicia --Pedro Puy (PPdeG), Gonzalo Caballero (PSdeG), Luca Chao (Común da Esquerda), Olalla Rodil (BNG) e Luís Villares (En Marea)--.

Tamén ás 12,00 horas deste luns, a fachada principal do edificio administrativo de San Caetano, na capital galega, acolleu outra concentración en repulsa polo crime machista da Pastoriza na que participaron o número dous do Goberno galego, Alfonso Rueda, a secretaria xeral de Igualdade Susana López Abella e outros cargos do Executivo como os conselleiros Rosa Quintana, Jesús Vázquez Almuiña, Román Rodríguez, Valeriano Martínez e Fabiola García.

DELEGACIÓN DO GOBERNO

Na concentración convocada ante a Delegación do Goberno, o delegado do Goberno en Galicia, Javier Losada, quixo trasladar "ante este novo episodio de violencia de xénero" a solidariedade á familia. "Unha vítima máis dunha secuela social na que non pode haber ningún tipo de pero, ningún tipo de dúbida, ningún tipo de comprensión, ningún tipo de explicación", dixo ante o que cualificou como "violencia machista".

Ademais, lembrou que son xa "62 mulleres galegas mortas desde 2003" e que o caso da Pastoriza é o primeiro deste ano. "Temos que conseguir que sexa a última e iso depende de toda a sociedade e de todas as institucións para convencer, para axudar a trasladar que somos iguais e que non hai ningunha dependencia de ninguén sobre outra persoa", apuntou Losada, quen confirmou que o "afecto" á familia da falecida fíxoo tamén chegar a través dunha conversación co alcalde do municipio.

Por outra banda, instou a estar "vixiantes para previr casos así". Tamén aludiu expresamente "aos negacionistas" da violencia de xénero. "Non se pode matar unha muller e matar unha muller é violencia de xénero e violencia machista", recalcou Losada. Ademais, subliñou a necesidade de traballar especialmente no rural, "unha tarefa na que hai que redobrar máis o esforzo", admitiu.

COLECTIVOS FEMINISTAS

Ademais dos minutos de silencio que se reproduciron por toda a xeografía galega ao longo da mañá, na tarde noite deste luns, colectivos feministas convocaron concentracións en cidades, vilas e pobos de Galicia para expresar a súa dor polo crime da Pastoriza e reclamar o fin da violencia contra as mulleres.

O rexedor da Pastoriza, Primitivo Iglesias, asistirá á concentración que terá lugar a partir das 20,30 horas ás portas da casa consistorial do municipio onde residía a vítima, Manuela Iglesias, que recibirá sepultura na tarde deste luns.

A Pastoriza vive este luns a segunda das xornadas de loito oficial decretada polo pleno municipal na súa reunión extraordinaria celebrada o domingo tras coñecerse o crime rexistrado na noite do sábado na parroquia de Crecente. Ao termo da sesión, os edís e traballadores deste concello da Terra Chá de Lugo concentráronse ás portas do consistorio para condenar o sucedido.

GRUPOS POLÍTICOS

Nas roldas de prensa celebradas este luns no Pazo do Hórreo, todos os grupos políticos con presenza na Cámara galega expresaron o seu pesar polo primeiro crime machista rexistrado en Galicia en 2020.

Alí, o portavoz parlamentario de Grupo Parlamentario Popular, Pedro Puy, que participou no minuto de silencio convocado na Cámara autonómica, sumouse á condena polos feitos da Pastoriza e trasladou o "pesar e apoio" dos populares ás familias que viviron o impacto de "este tráxico acontecemento".

O líder do PSdeG, Gonzalo Caballero, tamén trasladou as condolencias dos socialistas galegos á familia da falecida e condenou un crime que, ao seu xuízo, constitúe "unha mostra máis" de como se deben ter "todas as alertas abertas" en materia de defensa das mulleres, da liberdade de toda a cidadanía e do dereito á vida.

Luca Chao (Común da Esquerda) sumouse ás condolencias a familia e achegados da vítima e avanzou que a súa formación estará presente nas concentracións convocadas polo colectivo feminista para "dicir con claridade que nin unha menos, que nos queremos vivas". Ademais, reclamou que "se poñan todos os recursos necesarios" desde as institucións públicas para que "non se repitan" crimes deste tipo.

Pola súa banda, noutra rolda de prensa ofrecida este luns, a viceportavoz parlamentaria do BNG, Olalla Rodil, pediu unha "resposta política igualmente firme". "Necesitamos máis e mellores servizos públicos, máis e mellores recursos e, sobre todo, illar politicamente a quen nega calquera forma de terrorismo machista", argumentou.

Por último, o portavoz de En Marea, Luís Villares, puxo o foco na necesidade de que no "discurso político" volva existir unha "unanimidade" que, para o maxistrado lucense, rompeu "pola irrupción da extrema dereita". Este, segundo Villares, debe ser o primeiro paso para que "o machismo e o patriarcado presente en todos os niveis sexa un mal recordo do pasado".

LUGO

En Lugo levouse a cabo unha concentración ás portas da Subdelegación do Goberno, á que asistiron, entre outros, a subdelegada do Goberno na provincia, Isabel Rodríguez; a alcaldesa da capital luguesa, Lara Méndez; o primeiro tenente de alcalde, Rubén Arroxo, e os portavoces do PP, Ramón Carballo, e de Cidadáns, Olga Louzao.

"Condenar unha vez máis este tipo de violencia machista, que nos afecta a toda a sociedade. Temos que estar todos unidos e desterrar este tipo de comportamentos machistas a nivel de toda España, e mandar unha mensaxe desde aquí de solidariedade e agarimo á familia e a todos os veciños e veciños da Pastoriza que están tan consternados coma nós. E dicir que xa abonda deste tipo de sucesos", sinalou Isabel Rodríguez tras a concentración que transcorreu en silencio e que reuniu a máis de medio centenar de persoas.

Ademais, expresou a "condena e repulsa por este suceso, por estes casos de violencia de xénero", a alcaldesa de Lugo, Lara Méndez, que participou na concentración ante a Subdelegación. E trasladou as "condolencias" ás familias e a todo o Concello da Pastoriza.

"Alí están todos consternados, e parece que cando un o ve á beira de casa aínda impacta moitísimo máis. Non pode ser que case sen acabar o primeiro mes do ano levemos seis vítimas mortais de violencia de xénero. As cifras son arrepiantes, pon os pelos de punta e debemos de concienciarnos como sociedade de traballar para tentar eliminar esta secuela", manifestou a alcaldesa de Lugo.

Concentración ás portas do Parlamento de Galicia en repulsa do crime dunha muller a mans da súa parella na Pastoriza (Lugo) | Fonte: Europa Press