O PSOE de Ourense pide a Feijóo que "antes de abandonar a Xunta deixe unha situación decente na sanidade no rural"

O PSOE de Ourense pediulle ao presidente do Goberno galego, Alberto Núñez Feijóo, que "antes de abandonar a Xunta de Galicia deixe unha situación decente na atención sanitaria no rural". Así o manifestou este luns o portavoz provincial do PSOE, Rafael Rodríguez Villarino, nunha comparecencia pública na que os socialistas denunciaron, unha vez máis, a "situación de desmantelamento sanitario" na provincia de Ourense e, en concreto, na zona oriental.

Como exemplos de recortes, Villarino expuxo a situación do paridoiro de Verín, do que destacou que "é un exemplo do que non se pode facer coa sanidade pública e que cando un pobo quere, é capaz de reverter a eliminación de dereitos que supón a política sanitaria de Feijóo".

Tamén fixo referencia ao Centro de Orientación Familiar de Ribadavia que, segundo as súas palabras, "está sen psicólogo desde hai meses e sen atender as mulleres". Un feito que para Villarino demostra que "as mulleres do rural tampouco contan para Feijóo".

Deste xeito, tamén se referiu a Amoeiro para sinalar que "leva anos esperando por unha enfermeira á que ten dereito o concello".

Pola súa banda, a alcaldesa de Trives, Patricia Domínguez, expuxo publicamente a situación do centro de saúde de Trives, un novo caso do que os socialistas consideran "o desmantelamento sanitario levado a cabo por Feijóo e o PP".

Neste contexto, a rexedora explicou que "Trives quedou cun só médico despois do traslado dun dos facultativos e o fin de contrato doutro que segue sen cubrir", unha situación que desemboca nun "centro de saúde colapsado, saturado e abandonado".

Patricia Domínguez sinalou que a situación no centro de saúde de Trives é "caótica ata o punto de que os veciños se viron na obriga de presentar varias reclamacións".

Mentres, por parte da administración municipal afirmaron levar a cabo "varias xestións", entre as que se atopan o envío dun correo electrónico o pasado 24 de xaneiro ao conselleiro de Sanidade, Jesús Vázquez Almuiña, expóndolle a problemática existente e solicitando unha reunión para solucionar o problema sanitario, "sen obter resposta".

A alcaldesa de Trives tamén lle remitiu un escrito ao propio conselleiro de Sanidade solicitando que "de maneira inmediata" se cubran as dúas prazas de médicos, "sen obter tampouco contestación".

"Temos a inquietude, e así está instaurada entre a poboación, que por parte da Xunta e o Sergas non se queira cubrir esa segunda praza de médico", apuntou Patricia Domínguez.