Retiran o banco instalado polo Concello de Noia sobre un petróglifo no monte San Lois

Técnicos da Dirección Xeral de Patrimonio acudiron este luns a Noia para supervisar a retirada dun banco que se instalou sobre un petróglifo sen catalogar e que foi descuberto hai uns días por un grupo de membros do colectivo A Rula durante unha prospección do lugar.

O banco cravouse sobre unha pedra nun punto elevado do monte San Lois tras unhas obras de humanización e limpeza realizadas na zona.

Varios membros do colectivo A Rula acharon nesta pedra uns gravados sen catalogar, moi erosionados pero visibles a plena luz do día, sobre os que o Concello de Noia instalara o mencionado banco.

O petróglifo atopábase, ademais, nunha zona de cautela do Castro do Monte San Lois, polo que a actuación municipal na zona debería contar con autorización da Dirección Xeral de Patrimonio.

Tras denunciar o caso, e apenas uns días despois de darse a coñecer, técnicos de Patrimonio acudiron ao momento para proceder á retirada do banco, aínda que a pedra quedou visiblemente danada.

O CONCELLO DEFÉNDESE

O Concello de Noia, pola súa banda, asegurou que a retirada se realizou "por decisión propia" do Goberno local e "baixo a supervisión dun arqueólogo" do departamento de Patrimonio, ademais de asegurar que permanecerá así ata que exista unha conclusión sobre o achado por parte da Xunta.

Así mesmo, defendeu a súa actuación, posto que o petróglifo "non estaba inventariado nin catalogado" no momento de instalar o banco nin constaba no PXOM, ou no Plan Básico Autonómico.

A obra deuse a coñecer en marzo do ano pasado e a propia concelleira de Medio Ambiente, Ángela Neri Arufe, difundiu e promocionou as actuacións realizadas no seu día no punto a través das redes sociais.