Os traballadores de Meirama inician unha folga indefinida

O comité de empresa da central térmica de Naturgy en Meirama, no municipio coruñés de Cerceda, decidiu "por acordo maioritario" convocar unha folga indefinida a partir deste martes "para conseguir un compromiso de investimento" por parte da compañía co que manter os postos de traballo tras o seu peche, programado para o 30 de xuño.

Os traballadores explican que, despois de varias reunións mantidas coa dirección de Naturgy entre os meses de novembro e febreiro, a empresa "non vai realizar ningún investimento nas comarcas afectadas no futuro próximo".

"Soamente está 'a estudar' a construción a longo prazo de dous parques eólicos, incumprindo o previsto nos plans de transición xusta do Ministerio de Transición Ecolóxica para as zonas afectadas polo peche de minas e centrais térmicas de carbón", engade o comité.

Así, os empregados lamentan que Naturgy "descarte" a conversión da planta á biomasa ou ao biogás, "cuxo estudo solicitara a Xunta de Galicia". Paralelo a iso, tamén critican que a compañía "tampouco contemple ningunha alternativa laboral" para as auxiliares.

"Ante esta situación e como último recurso para conseguir un compromiso de investimento na comarca, que permita o mantemento dos postos de traballo, o comité de empresa da central térmica de Meirama, por acordo maioritario, realizou a convocatoria legal dunha folga indefinida que dará comezo o día 10 de marzo de 2020", é dicir, este martes.

Non en balde, os traballadores critican que Naturgy "rexeitase" a solicitude de mediación que presentaron ante o Consello Galego de Relacións Laborais da Xunta e que se tivesen que decatar da solicitude de peche, presentada en decembro de 2018, "polos medios de comunicación".