O Festival de Ortigueira suspende a edición deste ano para centrar esforzos contra a crise sanitaria
"A parte do investimento do Concello prevista para esta edición dedicarase a combater a emerxencia social, económica e sanitaria da comarca, e os esforzos organizativos centraranse en preparar un 2021 que compense a espera con varias novidades", remarca a organización.
Por Europa Press / Redacción | SANTIAGO DE COMPOSTELA | 20/04/2020 | Actualizada ás 18:55
A organización do Festival Internacional do Mundo Celta de Ortigueira decidiu cancelar a edición deste ano 2020 debido á crise sanitaria coronavirus.
Así, segundo recolle a páxina web desta cita, "tras varias reunións e avaliar todos os posibles escenarios, a organización decidiu non celebrar a edición deste ano e centrar os seus recursos en paliar os efectos da crise sanitaria no tecido social e empresarial da comarca".
"A parte do investimento do Concello prevista para esta edición dedicarase a combater a emerxencia social, económica e sanitaria da comarca, e os esforzos organizativos centraranse en preparar un 2021 que compense a espera con varias novidades", remarcan.
Segundo o alcalde de Ortigueira, Juan Penabad (PSOE), "despois de diferentes reunións en marzo e abril entre o Concello e os diversos axentes implicados da organización, coordinación e seguridade", decidiuse dar este paso adiante "antes de incorrer en gastos que impedisen dedicar os seus recursos ao que agora é verdadeiramente importante".
EN 2021
Desde a organización xa foi fixada a data da próxima edición, "que terá lugar do mércores 14 ao domingo 18 de xullo de 2021." Nesta edición, manterase o cartel artístico previsto, coa presenza das principais cabezas de cartel e haberá varias novidades. Unha importante será que se ampliará un día, e o festival comezará xa o mércores, "que será un día dedicado a fomentar a presenza dos novos valores da música celta mundial, gañando en entidade".
Segundo destacan desde a organización, "no seu firme compromiso coa cultura e os novos talentos da música folk" o 'Día Runas' actuarán seis bandas, o tres finalistas de 2020 e o tres do próximo 2021.
