Feijóo non volverá comparecer na Cámara para abordar a crise do coronavirus... de momento
O PPdeG di que xa compareceron catro conselleiros. A reunión dos grupos, despois dun tenso debate, sáldase sen acordo e co compromiso de facer unha proposta concreta.
Por Europa Press / Redacción | SANTIAGO DE COMPOSTELA | 22/04/2020 | Actualizada ás 20:01
A convocatoria de comparecencias dos conselleiros de Sanidade, Jesús Vázquez Almuiña, e de Educación, Carmen Pomar, serviron de foro para que os grupos da oposición volvesen a alzar as súas voces para pedir que o presidente da Xunta, Alberto Núñez Feijóo, acuda de novo ao Parlamento para comparecer en plena crise sanitaria pola covid-19. Mentres, o PPdeG defendeu que xa acudiron catro conselleiros --os dous deste mércores xunto co vicepresidente, Alfonso Rueda, e a de Política Social, Fabiola García--, e o propio mandatario autonómico.
Pola súa banda, o líder socialista, Gonzalo Caballero, fixo un "chamamento" para "corrixir a carencia democrática" e reclamou que o presidente da Xunta acuda a "comparecer" á Cámara. "Non se pode esconder detrás das cámaras da TVG", salientou. Moi crítica con iso mostrouse a nacionalista Ana Pontón, que cualificou de "telepresidente" a Feijóo por facer, desde que empezou o estado de alarma, "19 roldas de prensa" que foron retransmitidas polo medio público, fronte a unha única comparecencia na Deputación Permanente.
O portavoz do Grupo Común da Esquerda, Antón Sánchez, tamén lamentou a "campaña de intoxicación" da Xunta e tamén considerou indispensable que o mandatario autonómico acuda á Cámara a render contas, ante "calquera xesto de humildade e autocrítica" do Goberno galego. Davide Rodríguez (En Marea), como integrante do Grupo Mixto, tamén criticou que Feijóo "consuma tempo no prime time" da Galega "facéndose propaganda", mentres a Cámara "está a vetar o labor dos grupos".
CLIMA DE TENSIÓN SEN ACORDO
Neste clima de tensión reuníronse os portavoces dos grupos parlamentarios para tratar de porse de acordo en como manter unha actividade mínima no Parlamento, tras o informe dos servizos xurídicos que permite, en primeiro lugar, tramitar preguntas de control ao goberno.
Ademais, os letrados da Cámara tamén especificaron no seu informe que terían cabida regulamentaria iniciativas de impulso como as proposicións non de lei, pero para iso sería necesario un "acordo político".
Fontes dos grupos parlamentarios consultadas por Europa Press ratificaron que non se chegou a ningún acordo e que quedaron en citarse de novo cunha proposta concreta encima da mesa, despois de que as suxestións que se fixeron este mércores non fosen aceptadas pola maioría.
