Médicos internistas galegos consideran unha "esaxeración" os criterios de camas que pide o Goberno para a desescalada

O presidente da Sociedade Galega de Medicina Interna (Sogami), Javier de la Fuente, asegurou que en Galicia "máis que previsión de camas" fai falla "detección e illamento precoz" de pacientes COVID-19.

Así o manifestou en declaracións a Europa Press, nas que considerou unha "esaxeración" os criterios de entre 1,5 e 2 camas de UCI e entre 37 e 40 camas de enfermos agudos por cada 10.000 habitantes que pide o Goberno central para avanzar nas fases de desescalada. "Aquí nunca colapsamos", afirmou Javier de la Fuente, como "en Madrid e Barcelona", e matizou que "a epidemia ao principio foi ao seu aire".

"Paréceme esaxerado", insistiu sobre o cociente de 1,5 ou dúas camas en UCI por 10.000 habitantes, para asegurar que Galicia dispón delas "se se habilitan zonas non UCI" como unidades de reanimación. Por iso, afirmou que os hospitais galegos están "preparados" para afrontar a desescalada, pero "non nas cifras que dá o Goberno". "É unha esaxeración o que pide na realidade na que nos movemos en Galicia", apostilou.

Respecto diso incidiu en que "o Sergas traballou de forma coordinada cos hospitais" e "todos fixeron plans de continxencia liderados por profesionais".

No entanto, o doutor De la Fuente subliñou que "nunca debería ocorrer unha onda como a primeira" porque "sería un fracaso". "Nunca se debería chegar a un brote como o anterior. Aquí nunca estivemos colapsados", aseverou.

Neste sentido, o presidente de Sogami aclarou que "unha cousa é a falta de previsión que se tivo ao principio desde o Goberno central co número de afectados que ía haber e nos primeiros días non houbo medidas de control", matizou.

Por iso, aínda que admitiu que os hospitais galegos están en disposición "para crecer en número de camas", os servizos de alerta epidemiolóxica "deben estar vixiantes". Con todo, advertiu de que en caso de chegar a unha situación similar como á primeira onda da pandemia os dirixentes deberían "presentar a súa dimisión". "Nunca se debe chegar á eclosión que houbo a vez anterior", concluíu.