Morre Manuel Jove, o carpinteiro coruñés que fundou o maior emporio inmobiliario de España

O empresario galego e presidente da corporación Inveravante, Manuel Jove, faleceu esta madrugada na súa casa da Coruña, tras un ano de loita contra unha longa enfermidade "contra a que pelexou con forza, fiel ao seu talante", segundo informou a corporación empresarial.

Manuel Jove, nacido na Coruña en 1941, estaba casado, con dous fillos. En 2002 faleceu a súa filla maior, María José, e na súa memoria, en 2003, creou a Fundación María José Jove que traballa en favor da infancia e a inclusión.

A Manuel Jove poderíaselle definir como "un gran emprendedor, un traballador incansable, cunha excelente visión para os negocios, e unha persoa fiel aos seus, ao seu equipo", segundo resaltou a corporación.

De orixe humilde, os comezos de Manuel Jove Capelán foron no taller de carpintaría que o seu pai tiña na Coruña, lugar no que empezou a traballar cando tiña 11 anos. O espírito emprendedor chegoulle moi pronto e, con 19, decidiu independizarse e abrir co seu irmán un taller propio.

A comezos dos 70, fundou a inmobiliaria Fadesa. En apenas 25 anos, a compañía que presidía pasou de ser unha empresa local a unha das inmobiliarias máis importantes do mundo. En 2007, Manuel Jove vendeu a compañía e emprendeu novos proxectos e investimentos a través da corporación Inveravante.

Con sede na Coruña, Inveravante é unha corporación de ámbito privado e familiar. Desenvolve a súa actividade desde Galicia no ámbito inmobiliario, hoteleiro, produtos agroalimentarios selectos e enerxía e está presente en España, Marrocos, México, Brasil, Panamá, República Dominicana e Romanía. Conta con máis de 800 postos de traballo directos e dous vicepresidentes: Felipa Jove e Manuel Anxo Jove.

CONDOLENCIAS DOS EMPRESARIOS

Empresarios galegos trasladaron o seu pésame á familia do empresario coruñés Manuel Jove --falecido esta madrugada--, do que destacan, entre outras cuestións, a súa "tenacidade".

Nun comunicado, a Confederación de Empresarios de Galicia (CEG) expresa a "profunda consternación" polo seu falecemento, ademais de trasladar o seu "pésame e agarimo" á familia e achegados.

Do empresario galego destaca que foi "impulsor de grandes compañías como Fadesa", ademais de recalcar a súa etapa como presidente de Inveravante. Tamén o cualifica como un "referente da construción". "Primeiro en Galicia e, máis tarde, en España cando fundou Fadesa, unha inmobiliaria que se chegou a converter no maior grupo independente neste sector".

Por outra banda, lembra que ocupou o cargo de presidente de laAsociación Provincial de Promotores Inmobiliarios da Coruña,organización integrada na CEC, e que era membro do comité executivo da Asociación Nacional de Promotores de España.

Do que define como "embaixador do ladrillo coruñés", sostén que era tamén "un gran defensor da súa cidade, da que nunca se foi, un auténtico comprometido coa infancia e a inclusión". "Proba diso foi a creación, en 2005, da Fundación María José Jove, a favor de ambas as causas, e por mor da morte da súa filla maior", apostila.

CONDOLENCIAS DA CÁMARA DE COMERCIO

Na mesma liña, a Cámara de Comercio da Coruña traslada as súas condolencias á familia do empresario coruñés, "con quen a entidade cameral mantivo unha estreita relación desde que comezase a súa actividade empresarial á fronte de Fadesa, a principios dos anos 70 e ata o día de hoxe, no que a corporación Inveravante que presidía é socia e membro dos órganos de goberno da Cámara", explica.

Para este organismo, a ausencia do empresario coruñés deixa "un oco insubstituíble máis aló das nosas fronteiras". "A súa constancia e tenacidade como traballador incansable, convertéronlle nun gran emprendedor cunha excelente visión para os negocios". "Foi, en definitiva, unha persoa fiel aos seus e ao seu equipo", asevera.

Así mesmo, móstrase "profundamente agradecida á figura do empresario, así como ás empresas que pertencen.

CONCELLO DA CORUÑA

O Concello da Coruña sumouse ás mostras de pésame pola morte de Manuel Jove, do que destaca, entre outras cuestións, a súa capacidade emprendedora.

A alcaldesa, Inés Rey, expresa o seu "sentimento de pesar" pola morte do empresario, que, segundo precisa, xa se lle trasladou á familia.

Del, destaca, ademais, a súa capacidade de "emprendemeento", a súa "solidariedade" e "a contribución a iniciativas de interese para a cidade".

Entre elas, cita "as educativas, culturais e de inclusión social" que levou adiante a Fundación María José Jove "en moitas das cales e desde hai moitos anos vén colaborando o Concello".

"Ou o apoio que Fadesa deu á Orquestra Sinfónica de Galicia, da que foi un dos mecenas relevantes contribuíndo a facer da OSG un dos proxectos culturais de máis éxito, e de futuro, das últimas décadas". "A cidade sente a súa perda", sinala nun comunicado no que reitera o seu pésame á familia e amigos do empresario.