Os ópticos galegos reciben directrices para desenvolver a súa actividade "de forma segura"

O Colexio de Ópticos-Optometristas de Galicia fixo chegar a estes profesionais, máis de 1.180, un 'Protocolo de Hixienización e Seguridade nos Establecementos sanitarios de Óptica e outros lugares de exercicio profesional' elaborado polo Consello Xeral de Colexios de Ópticos-Optometristas de España que facilita as directrices para desenvolver a súa actividade "de forma segura".

Así o informou a entidade colexial, que sinalou que o obxecto deste documento "é protocolizar as actividades propias dun establecemento sanitario de óptica ou dunha consulta optométrica" para "afrontar convenientemente o escenario posterior ao período de estado de alarma, declarado a consecuencia da pandemia da COVID-19", matiza.

En concreto, este documento proporciona as directrices e recomendacións sobre como os ópticos-optometristas deben desenvolver a súa actividade, "asegurando durante a súa práctica a mellor protección sanitaria, cos máis altos estándares de seguridade", para os pacientes, eles mesmos e os seus equipos humanos no exercicio da súa profesión, incidiron as mesmas fontes.

"Proporcionamos unhas pautas fundamentais, así como recomendacións xerais e específicas sobre a nosa actuación profesional", asegurou o presidente do Colexio de Ópticos-Optometristas de Galicia, Eduardo Eiroa.

CONTIDO

O protocolo ofrece aos profesionais do sector información xeral sobre a transmisión do virus como períodos de incubación, taxas de letalidade e risco específico dos profesionais da saúde e dos diferentes grupos poboacionais.

Ademais, inclúe as características fundamentais dos equipos de protección individualizada (EPIs), da súa forma correcta de utilización e a súa esterilización, abundaron as mesmas fontes.

Neste punto, ademais de lavarse as mans con solución alcohólica, porse bata, máscara, lentes ou protección ocular e luvas, o protocolo aconsella "recollerse o pelo, evitar o lacado de uñas e prescindir do uso de xoias e complementos, así como de bases de maquillaxe que poidan servir de adhesión para os virus".

En etapa epidémica, o protocolo establece, para protexer e reducir o risco de propagación na zona especificamente dedicada á atención clínica, realizar unha cribaxe telefónica ao pedir cita para pescudar que tipo de paciente é (de alto risco, vulnerables, de baixo risco ou inmunes ao coronavirus).

Se se recibe a un paciente no mostrador da óptica, ben con cita previa ou porque entra no establecemento directamente, o óptico-optometrista terá que realizarlle ou repetir as preguntas da cribaxe para finalmente encher unha ficha de paciente.

Unha vez na sala de espera, desinfectada segundo os criterios de limpeza, os pacientes deberán levar máscara, lavarse as mans con solución hidroalcohólica e sentar respectando a distancia mínima de seguridade de dous metros.

Xa na consulta ou gabinete, o contacto do paciente coa superficie dalgúns dispositivos "vai ser ineludible", indica a entidade colexial, e a distancia de seguridade entre paciente e optometrista "reducida", polo que o cumprimento das normas de seguridade e a correcta limpeza dos espazos e dispositivos "faise aínda máis necesario".

"As zonas de exposición de produtos, atención ao público e dispensación son, posiblemente, os espazos máis expostos á transmisión da COVID-19", avisa.

Unha vez superada a etapa epidémica, o documento facilita información para saber como actuar para protexer e reducir o risco de propagación en calquera establecemento sanitario de óptica na zona especificamente dedicada á atención clínica, cun protocolo concreto para todas aquelas probas e exploracións que realiza habitualmente o óptico-optometrista, desde a reserva da cita programada á presenza física na consulta, tanto para exploracións rutineiras como para tratamentos específicos, como rehabilitación visual, baixa visión e a práctica da contactoloxía para a súa adaptación e asesoramento de sistemas de mantemento aos pacientes.