A Xunta fíxase como obxectivo que ardan menos de 17.000 hectáreas este ano con menos medios aéreos dispoñibles

A Xunta fíxase o obxectivo de que ardan menos de 17.000 hectáreas en 2020, no marco dunha campaña na que se buscará "incrementar" a detención de incendiarios, á vez que se tratará de reducir a media de 548 lumes anuais rexistrados na última década.

Estas son algunhas das cifras que se recollen no plan de loita contra o lume (Pladiga) da actual campaña, un documento provisional a falta de ser trasladado ao Consello Forestal de Galicia antes da súa posterior aprobación definitiva polo Consello da Xunta.

Tras un 2017 marcado pola vaga de lumes no que houbo máis de 62.000 hectáreas arrasadas, Galicia viviu dous anos cun descenso significativo de terreo queimado en 2018 (2.600 hectáreas) e 2019 (6.838 hectáreas).

Agora, para 2020, o Goberno galego sinala que sería "óptimo" non alcanzar as 17.000 hectáreas —-preto de 5.300 delas de superficie arborada—, e quedar deste xeito por baixo da media dos últimos dez anos tras eliminar os valores máis altos e baixos da serie.

Mentres, traballarase para que a media de superficie queimada por cada lume non chegue a cinco hectáreas. A meta é manter no 70% do total a taxa dos incendios dunha hectárea ou menos.

Así mesmo, espérase que os lumes de máis de 25 hectáreas estean por baixo do 2% e que non se activen máis de 13 veces as situacións de tipo 2, nas que están ameazadas vivendas polo lume.

AUMENTO DE REDE DE CÁMARAS E DE COMPRA DE DRONS

Para a campaña deste ano haberá 120 cámaras operativas nunha rede de videovixilancia que cubrirá o 59% do territorio, cinco puntos por enriba do que se abarcaba no Pladiga de 2019.

Entre outros obxectivos, o Pladiga tamén recolle reducir o número de incendios en zonas de especial vixilancia, así como aumentar a proporción de lumes detectados na súa fase inicial polas cámaras.

Ademais, compraranse " máis" drons e incrementarase a formación de axentes no seu manexo. Usaranse para tarefas de prevención e detección de incendios, vixilancia das obrigas de control da biomasa e para investigación.

Xunto a isto, está previsto implementar un plan piloto de "sensorización" que permita dispor de datos meteorolóxicos "permanentemente actualizados" da contorna no que se produza un incendio forestal.

Este ano mantense o teléfono (900 815 085) posto en marcha en 2019 para que realicen denuncias anónimas sobre actividade incendiaria. Aquí, trabállase nun protocolo consensuado para recoller información "clave" para activar as liñas policiais de investigación coa posta a disposición xudicial.

MÁIS AVIÓNS E MENOS HELICÓPTEROS

No tocante aos medios aéreos da Xunta no alto risco, aumentan os avións de carga en terra de dous a catro, aínda que baixan os helicópteros de 16 a 13 respecto do Pladiga de 2019 —redúcense os de tipo lixeiro de 8 a 5, mentres se manteñen os 6 de tipo medio e os 2 de coordinación—.

Isto provoca que o total de medios aéreos da Xunta pasen de 18 en 2019 a 17 en 2020. Así mesmo, tamén haberá un medio aéreo menos dispoñible de recursos estatais, pois serán 11 fronte aos 12 de 2019 —un avión anfibio menos—.

O Pladiga prevé a intervención de máis de 7.000 persoas en total, que reúne tanto os profesionais propios da Administración galega, como aos adscritos e a outras institucións. Con todo, obsérvase unha diminución na contratación do persoal de medios aéreos no período de alto risco ata 136, fronte aos 148 de 2019, unha diferenza dunha ducia de persoas que son peóns de brigadas helitransportadas —redúcense de 84 a 72—.

A Xunta prevé a compra de 11 motobombas en 2020, así como a renovación de diferentes vehículos.

UN TOTAL DE 22 DAS 28 PARROQUIAS DE RISCO ESTÁN EN OURENSE

Pola súa banda, as parroquias de alto risco de incendio rebáixanse de 71 a 28. Desas 28, un total de 22 atópanse na provincia de Ourense.

A Gudiña é o municipio con maior número de parroquias de alto risco de incendios, con catro. Séguenlle Manzaneda (3), Oímbra (2), Cea (2) e Vilariño de Conso (2). O resto de municipios ourensáns cunha parroquia son: Melón, Piñor, Chandrexa de Queixa, Maceda, A Veiga, Cualedro, Laza, A Mezquita e Muíños.

Os municipios da provincia da Coruña con parroquias de risco son: Carballo, Lousame, Porto do Son e Ribeira. En Pontevedra hai tamén unha parroquia na Cañiza e outra no Porriño. Pola súa banda, non hai ningún caso en Lugo.

BORRADOR DE LEI DE PREVENCIÓN INCENDIOS

A Consellería de Medio Rural márcase como tarefa deste ano a elaboración dun novo borrador de lei de prevención e defensa contra incendios forestais en Galicia, así como dun procedemento de participación do persoal do servizo (Spdcif).

Outros obxectivos pasan pola coordinación coas entidades responsables de realizar traballos de xestión de biomasa en redes de franxas primarias, unido a potenciar o emprego de queimas controladas para a xestión de biomasa mediante a elaboración dun protocolo para a súa execución --prevese facer unhas 2.000 en Galicia con medios propios--.

Outras metas serán actualizar os catálogos de equipos de protección individual (EPI) existentes e de medios de extinción nos distritos, xunto á divulgación entre escolares de prevención antincendios.