Vítimas de Angrois ven como "unha afronta máis" a fichaxe de Pepe Blanco por Enagás, unha "porta xiratoria da vergoña"

A Plataforma Vítimas Alvia 04155 cualificou de "unha afronta máis" a fichaxe do que fose ministro de Fomento do Goberno de José Luís Rodríguez Zapatero, José Blanco, pola empresa Enagás, un paso que tacha de "porta giratoria da vergoña".

A plataforma lembra que o Estado é o maior accionista desta empresa e critica que, en lugar de "asumir as súas responsabilidades", se premie ao exministro con "grandes postos ben remunerados e con alta responsabilidade".

"Queremos lembrar que sendo ministro de Fomento, José Blanco inaugurou, en decembro de 2011, a liña de Alta velocidade Ourense-Santiago", sinalan as vítimas, que lembran que "un ano e medio despois tivo lugar a traxedia ferroviaria máis grave da democracia, deixando 80 mortos e máis de 140 feridos".

A plataforma acusa a Blanco de publicitar "aos catro ventos" a nova liña de alta velocidade, "asegurando que se incrementaba a seguridade e que, tanto a liña como o tren, contaban cos sistemas de seguridade que evitasen o accidente". "Enganou a toda a cidadanía e á UE", critica.

Ademais, sostén que "sendo ministro" Blanco "asinou e autorizou o cambio de proxecto orixinal" de forma que se "suprimía o sistema de seguridade no tramo máis perigoso". "Un proxecto que levaba anos aprobado e en execución. É máis, se xactaba de adiantar os prazos", apunta.

"No seu afán de levar a alta velocidade a Galicia encomendou a Talgo a fabricación dun tren único no mundo que salvaba todos os obstáculos, un tren cuxo deseño e peso fixo que as consecuencias do accidente fosen posiblemente moito máis graves", engade a plataforma, que cita os procedementos de infracción abertos pola UE a España por "incumprimento da normativa europea de seguridade ferroviaria".

Por todo iso, considera que non se entende que Enegás fiche a unha persoa "con este currículo" e mostra o seu "rexeitamento e máxima indignación" polo nomeamento. "Unha auténtica burla e falta de respecto á memoria dos falecidos, ás súas familias, a todas as vítimas do accidente e a todos os cidadáns", censura.