O ministro Escrivá pon Galicia como exemplo de comunidade que dedica pouco orzamento a rendas de inclusión

O ministro de Inclusión, Seguridade Social e Migracións, José Luís Escrivá, defendeu o ingreso mínimo vital como un "último nivel de seguridade" ante "situacións sobrevindas de pobreza, de mala sorte ou de exclusión social" e destacou que acabará coas "disparidades rexionais" das rendas mínimas autonómicas que xa existían.

Neste punto, durante a súa intervención este martes no Senado, o ministro insistiu na necesidade deste ingreso mínimo vital para acabar coas "disparidades rexionais" pois, segundo dixo, mentres que o salario social de Asturias estaba "moi ben dotado, con 125 millóns de euros", en Galicia, "con tres veces máis de poboación", dedicábase "a metade do orzamento" e chegábase á metade de fogares.

"En España non existía un mínimo para todos os españois de cobertura, un último nivel de seguridade de renda ante situacións sobrevindas de pobreza, de mala sorte ou de exclusión social, xa hai un mínimo para todos, a responsabilidade quedara en mans das comunidades autónomas e dependía da orientación das políticas sociais de cada unha", explicou Escrivá este martes 16 de xuño no Pleno do Senado.

Así o indicou en resposta a unha pregunta da senadora do PSOE María Fernández Álvarez, que lle interpelou sobre como valora o Goberno o avance social que supón este ingreso mínimo vital, que se pode solicitar desde este luns 15 de xuño.

A senadora socialista definiu esta nova prestación como "un gran paso na construción do estado social" e puxo de manifesto que foi "unha vez máis un goberno socialista, neste caso, no marco dun goberno de coalición, quen impulsa outro dos grandes avances do Estado do Benestar" concluíndo que "existen outras formas de xestionar as crises, non deixando a ninguén no camiño".

Tamén destacou a importancia do desenvolvemento dos itinerarios de inclusión laboral para que os beneficiarios non se "instalen" neste tipo de axudas senón que lles permitan transitar cara ao mercado de traballo. Aínda que, explicou que hai casos nos que "a empregabilidade non é directa" e por iso, "o centro é a inclusión social".