Convocan unha marcha para esixir "xustiza para Diego Bello" tras arquivar a causa a Audiencia Nacional

Amigos e familiares de Diego Bello Lafuente, o mozo coruñés que morreu nunha operación policial o pasado 7 de xaneiro na illa de Siargao, en Filipinas, convocaron unha marcha para esixir "xustiza para Diego" tras arquivar a Audiencia Nacional a causa que se seguía pola súa morte. Así o confirmou Francisco Lafuente, tío de Diego e portavoz da familia, que sinalou que a Audiencia Nacional estima "que non é competente para xulgar este delito en España ao tratarse dun caso de homicidio e non ser esta uhna das causas que a xustiza española contempla como incluída na xustiza universal e que posiblitaria o inicio da causa".

A Audiencia Nacional abrira dilixencias previas cando se fixo cargo do caso, ordenando, entre outras accións, a realización dunha autopsia ao corpo de Diego cando chegou a Madrid, procedente de Manila, a finais do mes de xaneiro.

A familia de Diego avanzou que presentará un recurso contra o arquivo do caso, no que se entende que a morte do seu achegado está relacionada co tráfico de drogas.

"Tal como se fai constar no atestado policial filipino e por tanto a Audiencia Nacional si é competente para iniciar xuízo, ao ser esta circunstancia unha das contempladas na lexislación española como motivo para aplicar a xustiza universal ao caso".

Ademais deste recurso, familia e amigos de Diego reunidos na plataforma 'xustizaparadiego' iniciarán novas accións para reivindicar "o bo nome de Diego, posto en cuestión por unha policía, a filipina, sobre a que pesan sospeitas tanto a nivel de Comunidade Europea como na comisión de Dereitos Humanos da ONU", argumentan.

En concreto, convocaron unha marcha para o 3 de xullo, que sairá ás 20,00 horas do Obelisco da Coruña e finalizará ante a Delegación do Goberno, segundo informaron. O seu obxectivo é esixir o esclarecemento dos feitos.

"Trátase do primeiro español asasinado pola Policía filipina, e consideramos que o Goberno español debería esixir a Filipinas probas da relación de Diego co tráfico de drogas".

"Probas que, seis meses despois da súa morte, aínda non foron presentadas, polo que entendemos que se trata dun asasinato a sangue frío que o Goberno non pode permitir que quede impune", argumentan desde a familia, que negaron en todo momento que o mozo estivese relacionado coa venda de estupefacientes.