O PSdeG pide máscaras gratuítas para o alumnado e un sanitario por centro
Os socialistas propoñen 10 medidas para o inicio do curso porque ven á Xunta "desbordada e incapaz de dar unha resposta solvente"
Por Europa Press / Redacción | SANTIAGO DE COMPOSTELA | 26/08/2020 | Actualizada ás 13:26
O secretario xeral do PSdeG e portavoz parlamentario dos socialistas, Gonzalo Caballero, presentou este mércores un decálogo con 10 medidas para o inicio do curso escolar, entre as que están contratar máis profesores, que a Xunta dea máscaras gratuítas para o alumnado que se verá obrigado a levalas --por encima de seis anos-- e un reforzo na asistencia sanitaria da que dispoñen os centros.
Caballero compareceu nunha rolda de prensa para acusar á Xunta de chegar ás portas da volta ás aulas --os alumnos de infantil e primaria comezan o curso o 10 de setembro-- "sen facer os deberes" e "sen consenso coa comunidade educativa". "Todos os pais e nais estamos moi preocupados", dixo.
Así, os socialistas elaboraron un decálogo que chama a atención sobre 10 aspectos nos que actuar para comezar as clases neste "escenario diferente" provocado pola pandemia de covid. O primeiro dos puntos é a contratación de profesorado para poder reducir os cocientes de alumnos por aula. Cos 'fondos covid' recibidos do Goberno central, a Xunta podería contratar xa a 2.000 docentes, manifestou Caballero.
Ademais, tras as manifestacións da conselleira de Educación, Carmen Pomar, que dixo que non se poden reducir cocientes porque non hai espazos suficientes para os alumnos, o PSdeG reclama que o Goberno galego elabore un "mapa de espazos educativos" e que busque lugares "adicionais" para as clases. Algúns concellos, indicou, comunicaron xa posibles áreas nas que impartir materias.
Caballero propuxo reforzar a atención médica dos colexios e considerou que o "óptimo" sería "un sanitario en cada centro educativo", aínda que admitiu que "igual non é posible realizalo de forma inmediata, en 15 días". Tamén se fixo eco da reclamación de moitos concellos e pediu á Xunta que dote de fondos aos municipios para o reforzo da limpeza dos centros de Infantil e Primaria que deben asumir.
DIXITALIZACIÓN E CONCILIACIÓN
O decálogo esixe tamén un plan de dixitalización para que ningún alumno quede sen computador e garantir que todos poidan seguir as clases se houbese que recorrer á vía telemática e "profundar nas medidas de prevención" con controis de temperatura, alfombras desinfectantes nos accesos e dispensadores automáticos de xel.
Caballero estivo acompañado na súa comparecencia polos deputados Isaura Abelairas e Luís Álvarez, quen é o portavoz de Educación do Grupo Parlamentario Socialista e criticou a "falta de planificación moi grave" da Consellería de Educación, á que ve "superada e resignada", ademais de "desbordada e incapaz de dar unha resposta solvente".
