Medio cento de artistas e grupos galegos gravarán concertos no Gaiás para emitir na TVG e na Radio Galega
Os directos emitiranse ao longo do ano que vén, pero o calendario aínda non está pechado
Por Europa Press / Redacción | SANTIAGO DE COMPOSTELA | 27/08/2020 | Actualizada ás 14:16
A Cidade da Cultura de Galicia acolle desde este xoves e durante cinco semanas os traballos de gravación dos 50 concertos en directo de 'Galicia Emerxe', un novo programa musical que creou a Xunta co ánimo de reactivar o sector cultural fronte aos efectos da COVID-19.
Os directos, que foron presentados polo conselleiro de Cultura, Román Rodríguez, contan coa implicación da TVG para a súa emisión, co que o programa se presenta como unha "nova plataforma de promoción mediante un atractivo formato audiovisual, deseñado para a súa emisión televisiva e a súa posterior difusión en liña".
De feito, segundo explican fontes da consellería a Europa Press, emitiranse ao longo do ano que vén (o calendario aínda non está pechado) tanto na TVG como na Radio Galega, con motivo do Xacobeo 2021.
Esta produción audiovisual suporá a achega de 500.000 euros para a industria musical galega --están involucradas máis de 20 empresas técnicas do sector-- e os traballos de gravación desenvolveranse durante cinco semanas no escenario instalado no Museo Centro Gaiás.
GRUPOS E ARTISTAS
Os grupos e artistas que pasarán ao longo das próximas semanas polo escenario de 'Galicia Emerxe' son, por orde alfabética: A Banda da Loba, Abraham Cupeiro, Alejandro Vargas, Ataque Escampe, Bala, Banda Crebinsky, Branco Palamera, Boyanka Kostova, Budiño, Caldo, Dakidarría, De Vacas, Eladio e Os Seres Queridos, Faia, Familia Caamagno, Fernando Barroso, Furious Monkey House, Germán Díaz & Benjamín Otero, Ghost Beast, High Paw & Elephant Yards, Holywater, Laura LaMontagne & PicoAmperio, Luar na Lubre, Marcos Teira, Margarita Mariño, María Toro, Mercedes Peón, Mounqup, Novidades Carminha, Pablo Lesuit, Pauliña, Fachendoso, Rodrigo Romaní, Santi Araujo, Sés, Silvia Penide, Son Trío, Sumrrá, Susana Seivane, Talabarte, Tanxugueiras, Terbutalina, The Soul Jacket, Triángulo de Amor Bizarro, Wöyza, Xan Campos Trío, Xoana, Xoel López e Zënzar.
Os programas terán unha duración duns 40 minutos e ademais dos concertos incluirán a intervención dos protagonistas para falar sobre a súa traxectoria e os seus proxectos máis inmediatos.
