As "ilegalidades" da mina de Santa Comba poderían chegar ó Parlamento Europeo

Novo episodio de denuncia a respecto da minería en Galicia. O derradeiro "incumprimento" da legalidade vén de xurdir na mina de Santa Comba, onde a asociación ecoloxista ve unha serie de procedemento "ilegais" e que poderían rematar provocando "dano ambiental grave". Para evitalo, a plataforma vén de apoiar unha petición popular ó Parlamento Europeo -lanzada pola plataforma Montescola- pedíndolle á institución que tome cartas no asunto. 

As denuncias da mina de Santa Comba realizadas polas asociacións discorren paralelas ós presuntos incumprimentos que adoitan acontecer neste tipo de explotacións en Galicia. Así, e ao igual que o denunciado no proxecto mineiro Alberta 1, Verdegaia asegura a existencia dunha "fragmentación ilegal" do proxecto da actual concesionaria, que tomou as rendas da explotación sucedendo á empresa anterior uns anos atrás.

PRODUTOS "ALTAMENTE TÓXICOS"

A petición ó Parlamento Europeo, porén, ter por obxectivo obrigar á sociedade que explota o complexo a realizar un informe de impacto ambiental, trámite que segundo a asociación sería "preceptivo" neste caso pero que non foi realizado. "A empresa di que non se necesita, pero en 2008 foi publicado o informe dunha enxeñeira de minas da Xefatura Territorial no que se dicía o contrario", explica Nela Abella, de Verdegaia.

Dende a asociación destacan a necesidade de desenvolver o informe de acordo co risco que entraña a explotación, da que poderían verterse "produtos altamente tóxicos". Por riba, e segundo explican, o espazo da miña disponse a "curta distancia" de núcleos de poboación, unha situación que podería supoñer perigo para a saúde no caso de acontecer un "drenaxe acedo". "En realidade, a mina xa está causando dano porque a anterior empresa non restaurou o espazo como debería", defende Nela Abella.

Neste aspecto, a plataforma destaca que o propio plan de restauración disposto pola actual concesionaria resulta "insuficiente" e chaman a atención a que se vira reducido "á décima parte" co paso de anos. "O plan de restauración pasou de supoñer 874.000€ -segundo o informe de 2008- a tan só 53.000€. Algo pasa", destaca Nela. Ante esta situación, dende Verdegaia confían en conseguir os apoios suficientes para facer chegar a petición de Montescola ó Parlamento Europeo. Piden a colaboración da cidadanía para botar adiante o trámite: "non leva máis de 10 minutos", explican.

Ciberacción: Asina:
Petición ao Parlamento Europeo sobre a contaminación na mina de estaño e tungsteno de Santa Combahttps://t.co/4MJafT8mMx

— Verdegaia (@verdegaiaGZ) September 8, 2020