A RAG organiza unha xornada este xoves que abordará a faceta de Ricardo Carvalho Calero como crítico literario

A Real Academia Galega (RAG) organizará este xoves, a partir das 19,00 horas, unha nova xornada do simposio sobre Ricardo Carvalho Calero na que se profundará no labor como crítico literario do protagonista do Día das Letras Galegas 2020, segundo informa a institución académica.

A profesora honoraria da Universidade da Coruña (UDC) Pilar García Negro e a profesora de literatura galega da Universidade de Santiago de Compostela (USC), Dores Vilavedra, participarán neste encontro.

Tamén o fará o investigador Alberte Valverde nunha sesión que, nesta ocasión, moderará a académica Marilar Aleixandre, segundo informa a RAG.

A xornada poderá verse en directo a través de academia.gal, desde a sección dedicada a Carvalho Calero que a Real Academia Galega estreou este mes.

CONSELLO DA CULTURA GALEGA

O Consello da Cultura Galega (CCG) homenaxeou a Ricardo Carvalho Calero na súa cidade natal, en Ferrol. En concreto, foi no Teatro Jofre nun acto que serviu para mostrar a faceta "polifacética e creadora" do autor homenaxeado este ano co Día das Letras Galegas.

A presidenta do CCG, Rosario Álvarez, destacou, na súa intervención, que "presentamos dúas pezas que, en dous contextos distintos, evocan a cidade de Ferrol".

Expúxoo coincidindo coa presentación da publicación institucional 'Farsa das zocas' coa que a institución recuperou esta obra teatral do autor homenaxeado, acompañada dun estudo introductorio de Carlos Biscainho.

O acto terminou co concerto 'Ferrol 1916' na que se estreou a peza que o compositor Miguel Brotóns realizou a partir dun poema homónimo de Carvalho Calero.

"É este un preludio dos festexos que os días 30 e 31 de outubro traerannos de novo ao Teatro Jofre cos solemnes actos institucionais que honrarán ao autor homenaxeado", apuntou Rosa Aneiros, condutora desta actividade, prevista inicialmente para o mes de maio pero que se tivo que aprazar debido á pandemia.