Marilar Aleixandre gaña o Premio Eduardo Blanco Amor coa novela 'As malas mulleres'
O xurado destaca que a obra galardoada "recoñece o traballo das visitadoras de cárceres", como Concepción Arenal, "e as súas ideas progresistas e pioneiras".
Por Europa Press / Redacción | OURENSE | 28/11/2020 | Actualizada ás 18:39
A escritora Marilar Aleixandre é a gañadora do XXXIX Premio Eduardo Blanco Amor de novela coa súa obra 'As malas mulleres'.
Así o decidiu por unanimidade o xurado, que se reuniu no Centro Cultural Marcos Valcárcel na mañá deste sábado. A novela de Aleixandre, que recibirá un premio de 15.000 euros, foi seleccionada dun total de 32 orixinais presentados.
'As malas mulleres', presentada baixo o lema 'Láudano', ten ás soadas galegas Juana de Vega e Concepción Arenal como condutoras dun relato baseado no tramo final do século XIX. O xurado, tal e como reflectiu na acta do seu fallo, explica que esta obra "recoñece e destaca, literariamente, o traballo das chamadas visitadoras de cárceres e as súas ideas progresistas e pioneiras".
É unha novela, engade a resolución, na que Marilar Aleixandre incorpora elementos poéticos "que reforzan unha trama ben estruturada e compensada que enriquece o relato".
O Premio Eduardo Blanco Amor está organizado pola Deputación de Ourense e a Fundación Blanco Amor. Así, o presidente provincial, Manuel Baltar, foi o encargado de comunicar a noticia á escritora e académica da Real Academia Galega.
O acto de entrega do XXXIX Premio Eduardo Blanco Amor celebrarase o próximo 1 de decembro ás 11,00 horas no Pazo Provincial de Ourense, data na que se cumprirán 41 anos da morte do escritor que dá nome ao galardón.
