Detectado un brote na residencia San José de Narón con 11 usuarios afectados
Os usuarios de residencias con covid-19 en Galicia baixan a 319.
Por Europa Press / Redacción | SANTIAGO DE COMPOSTELA | 10/12/2020 | Actualizada ás 13:43
Un novo brote de covid-19 foi detectado nos centros residenciais para maiores da Comunidade, que contabilizan un total de 319 usuarios infectados, catro menos que hai un día. En concreto, o novo brote afecta á residencia San José de Narón, onde foron diagnosticados de coronavirus a nove usuarios que se suman aos outros dous residentes deste centro que xa deran positivo.
Así figura no último balance ofrecido polas autoridades sanitarias na mañá deste xoves, na que contabiliza un total de 319 os usuarios de residencias con diagnóstico covid-19 nestes momentos.
Son catro menos que hai 24 horas que corresponden con catro persoas falecidas relacionadas con centros de maiores que notificaron a última hora do mércores a Administración autonómica. Así, once residentes deron positivo e outros once saíron do cómputo de casos activos en centros de maiores por negativizar.
A maioría dos novos positivos corresponden á residencia San José de Narón, onde se detectaron 9 casos que elevan a 11 o total de usuarios afectados. Ademais, hai outros dous novos positivos na residencia Cesantes-Redondela, que ten agora un total de 15 casos activos entre os seus usuarios.
Así mesmo, retíranse do cómputo un total de once usuarios de residencias: catro do Asilo de Vilalba, catro da San Salvador de Guntín e tres da Pontevedra de Vilaboa.
Deste xeito, a residencia Vila do Conde de Gondomar continúa como o centro con máis casos cun total de 108 usuarios contaxiados. Pola súa banda, en segundo lugar atópase o Asilo de Vilalba, con 40. Ademais, a residencia Soremay de Pontevedra ten 39 positivos; mentres que a Pontevedra de Vilaboa conta con 31 casos.
TRABALLADORES DE RESIDENCIAS
Con respecto aos traballadores de centros xeriátricos, descenden a 186, dous menos que o día anterior, ao dar positivo 11 traballadores (10 do Asilo de Vilalba e un de Monte Tecla da Guarda) e saír do cómputo outros 13 empregados (seis da Nosa Señora das Virtudes de Pontedeume, tres da San Salvador de Guntín, tres da Nosa Señora dos Miragres de Barbadás e un da residencia de Larouco).
