O servizo Dixestivo do Complexo Hospitalario de Pontevedra, o mellor en España en atención asistencial á hepatite C

O servizo de Aparello Dixestivo do Complexo Hospitalario Universitario de Pontevedra (CHOP) recolleu este xoves o galardón estatal 'Best in Class 2020' pola súa atención asistencial á hepatite C. Estes premios son convocados cada ano pola publicación especializada Gaceta Médica, xunto coa Cátedra de Innovación e Xestión Sanitaria da Universidade Rey Juan Carlos, e teñen como obxectivo recoñecer a aqueles centros sanitarios que buscan a excelencia na súa atención aos pacientes.

Este ano, no que a gala de entrega de galardóns foi virtual e transmitida pola canle de Gaceta Médica en Youtube, prémianse as categorías de Mellor Centro de Atención Primaria, Mellor Hospital e os 37 Mellores servizos e unidades de todo o ámbito nacional, tanto de centros públicos como privados.

Entre os servizos médicos distinguidos nesta edición está o departamento de Dixestivo do CHOP que, desde 2015, ten en marcha unha planificación encamiñada a que "calquera paciente pode ter a posibilidade de curarse da hepatite C".

Esta enfermidade supón un problema de saúde pública moi grave, tamén coñecido como 'pandemia silenciosa', xa que non presenta síntomas ata que está nun estado moi avanzado. A hepatite C afecta a máis de 7 millóns de persoas no mundo e é a principal causa de cirrose hepática e cancro de fígado.

O servizo de Aparello Dixestivo do complexo hospitalario pontevedrés consolidou nos últimos anos un amplo abano de medidas para que calquera paciente con esta doenza teña posibilidade de curarse. En total, tratou a 916 persoas, e máis do 98 por cento superaron a enfermidade.

Grazas aos programas de diagnóstico e tratamento postos en marcha, estímase que a cifra de pacientes con este problema non detectados reduciuse nun 90 por cento. Así, a área sanitaria puxo en marcha medidas como a creación de circuítos de identificación de novos casos e acceso rápido a tratamentos; un sistema pioneiro para diagnosticar a hepatite C cunha única mostra de sangue; acceso a ensaios clínicos; ou uso de intelixencia artificial, entre outros avances.

O xefe do Servizo, Juan Turnes, lembrou que o éxito deste departamento depende do traballo dun equipo multidisciplinar, formado por profesionais de Atención Primaria, Farmacia, Microbioloxía, Admisión e coa colaboración do Instituto de Investigación Sanitaria Galicia Sur.

Nesta edición dos premios 'Best in Class 2020' houbo outros servizos do CHOP que resultaron finalistas, como a unidade de tratamento da asma, o servizo de Anestesioloxía e Reanimación; o servizo de Dermatoloxía, polo seu tratamento da psoriare; o servizo de Farmacia Hospitalaria, polo seu sistema de preparación de medicación BD CATO; e o propio complexo hospitalario pontevedrés, candidato a Mellor Hospital pola súa xestión das demoras asistenciais, a seguridade clínica, a relación coas asociacións de pacientes ou os recoñecementos de calidade.

ÁREA DE SANTIAGO E BARBANZA

Na área sanitaria de Santiago e Barbanza foron recoñecidos o centro de saúde da Estrada, e os servizos hospitalarios de Cardioloxía e Neuroloxías, así como a Unidade de Enfermidades Infecciosas de Pediatría.

Ademais, quedaron entre o cinco mellores de España os servizos de Microbioloxía, Pneumoloxía, Oncoloxía, Dixestivo, Reumatoloxía e Traumatoloxía.

A eles súmanse as unidades de Asma, Esclerose Múltiple, Farmacia Hospitalaria Oncolóxica, Hemodinámica, Cardiología Intervencionista e Investigación en Oncoloxía, así como o Premio de Humanización ao proxecto 'Construíndo o coidado'.

A concesión dos premios baséase na puntuación obtida polos candidatos co Índice de Calidade Asistencial ao Paciente (ICAP), que se establece a partir da análise multivariable dos datos recolleitos nos cuestionarios de autoevaluación cumprimentados en hospitais e centros de Atención Primaria.