Traballadores públicos maniféstanse en coche para pedir o fin do "abuso de temporalidade"

Traballadores temporais do sector público manifestáronse en coches en toda España este domingo convocados pola Plataforma de Traballadores Públicos Temporais en Fraude de Lei (MI15F), para pedir o fin do "abuso de temporalidade" na Administración e denunciar a "precariedade" que afecta a máis de 800.000 empregados públicos en España.

Os vehículos, adornados con globos amarelos e negros e con carteis coas súas reivindicacións, fixeron soar as súas bucinas ao longo de toda a marcha, que tivo lugar de 11,00 a 12,00 horas nun total de 27 cidades, entre elas Santiago de Compostela.

Na capital galega, unha comitiva con centos de vehículos saíu desde o aparcadoiro do Estadio Verónica Boquete de San Lázaro e dirixiuse cara ao Ensanche, onde percorreu varias rúas para logo volver ata o punto de inicio.

A plataforma convocou a marcha para reivindicar que "a Administración pública cumpra o Dereito da Unión, comprobando cada relación temporal, para determinar se incorre en Abuso de Temporalidade, e aplique como sanción ao incumprimento o mantemento do emprego ata que concorran as causas xerais de cesamento para todo traballador público mediante unha regularización administrativa".

Tamén reclaman que o Goberno atenda a Resolución do 31 de maio de 2018 do Parlamento Europeo, adoptando políticas de loita contra a Fraude na Contratación e contra o Abuso da Temporalidade no Sector Público, similares ás adoptadas no sector privado, como son a inspección e a sanción.

En materia de non discriminación, a plataforma reivindica que a Administración deixe de aplicar toda norma estatal que impida garantir a igualdade nas condicións de traballo dos traballadores temporais respecto dos fixos ou de carreira.