Detectados 11 positivos na DomusVi Laraxe, de Cabanas
Descende os usuarios de residencias contaxiados tras 31 altas, aínda que se detectaron 15 novos positivos
Por Europa Press / Redacción | SANTIAGO DE COMPOSTELA | 06/02/2021 | Actualizada ás 13:52
O número de usuarios de residencias contaxiados de covid-19 descende de novo ao rexistrarse 15 positivos (11 deles na DomusVi de Cabanas), 31 altas e catro falecementos, o que deixa o total en 351, 19 menos que hai 24 horas.
Así se desprende do balance diario ofrecido polas autoridades sanitarias, que cifran en 180 (-8) os casos nos persoais dos centros residenciais para maiores. Tamén hai este sábado 97 (-1) positivos entre usuarios de centros de discapacidade, que suman 38 (-3) traballadores contaxiados.
A Consellería de Política Social notifica 15 novos positivos entre usuarios das residencias de maiores, 11 deles no centro DomusVi Laraxe, de Cabanas (A Coruña). Os demais repártense nas residencias de Bande (1), Virxe da Clamadoira de Muíños (2) e San José de Ourense (1).
Por contra, saen do cómputo un total de 31 usuarios por negativizar nas probas do covid-19. A maioría son residentes na Quercus de Leiro (21), aínda que tamén rexistraron altas os centros DomusVi Laraxe (2), San Simón de Teo (1), Bande (2), Virxe da Clamadoira de Muíños (1) e San José de Ourense (1).
A estes hai que restar tamén o catro falecidos notificados na noite do venres polas autoridades sanitarias galegas: unha muller de 64 anos da DomusVi Laraxe, un home de 84 anos da Milagrosa da Coruña, outro home de 90 da Quercus de Leiro e, finalmente, unha muller de 95 da San Simón de Teo.
TRABALLADORES
Pola súa banda, o número de traballadores de residencias de maiores con covid-19 tamén descende este sábado despois de notificarse só dous positivos (un na DomusVi Laraxe e outro na Galisenior de Ourense) polo dez altas trasladadas por Política Social.
En canto aos centros de atención á discapacidade de Galicia baixan lixeiramente a 97 (-1) os usuarios contaxiados con covid-19 ao rexistrarse un novo positivo na residencia Juan Vidán Torres de Santiago, un alta no centro do Imserso en Betanzos e o falecemento dunha muller de 71 anos na Pai Menni de Betanzos.
