Galicia, entre as poucas comunidades que segue resistindo o avance de Vox
Xunto con Navarra, é a única CCAA sen un único cargo electo do partido ultra, que vén de medrar 11 escanos en Cataluña.
- O independentismo volve gañar en Cataluña
- Vox utiliza a Feijóo e Ayuso para cargar contra o Estado das autonomías
Por Galicia Confidencial | SANTIAGO DE COMPOSTELA | 15/02/2021 | Actualizada ás 21:00
Aínda que o gran gañador da noite electoral Catalana foi o independentismo --ou o PSC, segundo a quen se lle pregunte-- as eleccións do 14F deixaron outro claro trunfo da banda da extrema dereita. O partido ultranacionalista Vox pasou de non ter presentación a se colocar como cuarta forza política con nada menos que 11 escanos; sendo así a primeira forza 'constitucionalista' do Parlament por detrás do PSC.
O sorpasso do partido de Abascal ao PP e Podemos --atrás queda tamén, cada vez máis afundido, Cs-- senta un precedente perigoso no marco da política estatal. Vox é, polo momento, terceira forza do Congreso dos Deputados; un paradigma que podería cambiar no caso de que o esborralle do PP en Catalunya se traslade tamén ao ámbito estatal.
O pronunciado ascenso do partido ultra nun territorio que, a priori, semellaba hostil abre moitos interrogantes sobre o futuro da formación na política estatal. Tralo golpe de efecto de Ignacio Garriga sobre o Parlament, tan só quedan tres CCAA sen representación de Vox na súa cámara: La Rioja, Navarra e Galicia; onde o partido de extrema dereita non conseguiu representación algunha na derradeira cita electoral.
A incógnita desta falta de representación da extrema dereita no Parlamento Galego encheu as redes sociais nas horas seguintes á finalización do reconto electoral catalán, que deixou, en fin, varios trunfadores nunha soa noite. Coa caída de Catalunya, redúcese o grupo das Comunidades Autónomas que exercen de dique de contención contra a extrema dereita. Galicia, ao igual que Navarra, non ten --polo momento-- un só cargo público de Vox.
