Ciudadanos di que a Xunta "invade competencias que non lle corresponden" coa Lei de Saúde
A formación ve a Lei como "un parche" e oponse á vacinación obrigatoria: "Os galegos deben ser libres".
- Feijoo critica que negacionistas incumpriran o peche perimetral para manifestarse contra a súa Lei de Saúde
- O PP saca adiante a lei galega de saúde co rexeitamento da oposición por "utilizar o medo para recortar dereitos"
Por E.P. | SANTIAGO DE COMPOSTELA | 24/02/2021 | Actualizada ás 13:41
A coordinadora de Ciudadanos en Galicia, Beatriz Pino, afirmou este mércores que a reforma da Lei de Saúde "é un parche que non profunda nos problemas reais do sistema sanitario galego", á vez que se situou sobre aspectos como a posible vacina obrigatoria, alegando que "os galegos deben ser libres" nas súas actuacións.
"Falta diálogo nun tema tan crucial, máis cando falamos de dereitos fundamentais", dixo a responsable da formación en Galicia, que lamentou que esta lei non "profunde nos problemas reais do sistema sanitario como son a precariedade laboral dos seus traballadores ou a falta de sanitarios en atención primaria". Con iso, Ciudadanos Galicia considera que o presidente da Xunta "confunde o reforzo da sanidade pública coa limitación das liberdades individuais" dos galegos.
"Os galegos deben ser libres nas súas actuacións, e durante esta pandemia creo que todos vimos como a sociedade galega se comportaba de forma responsable ante as medidas restritivas impostas desde o Goberno Central ou desde a Xunta, mostra diso, foi a menor incidencia de casos que tivemos na nosa Comunidade en comparación con outras durante o tres picos de contaxios da pandemia", explicou Pino.
A formación considera que unha lei "non pode ir contra os dereitos fundamentais dun cidadán, como é a decisión de vacinarse ou non vacinarse" e que "o esforzo debe centrarse en que se poña máis empeño en mellorar os números de cidadáns vacinados". O mesmo ocorre, insistiu Pino, con outras vacinas como o sarampión ou o tétanos. "A Xunta debe ofrecer solucións e garantías á poboación, de forma gratuíta, co acceso a todo o calendario de vacinas, pero non cremos deba obrigar a ningún cidadán a vacinarse baixo ameaza de sanción", resolveu.
No canto de crear unha 'Lei de Pandemias' "exclusiva para Galicia", di Ciudadanos, "o PPdeG podería traballar sumando esforzos a nivel nacional para crear unha lei que afecte a todo o territorio", xa que "a Xunta está a invadir competencias que non lle corresponden", considerou Pino.
