O 21% dos falecidos en accidentes de tráfico en 2020 en turismo ou furgoneta non utilizaba cinto de seguridade
A DXT pon en marcha unha campaña especial para controlar o seu uso.
Por E.P. | SANTIAGO DE COMPOSTELA | 07/03/2021 | Actualizada ás 18:27
O 21% dos falecidos en accidentes de tráfico ocorridos en 2020 que viaxaban nunha furgoneta ou un turismo non utilizaba cinto de seguridade, segundo detallou o delegado do Goberno en Galicia, Javier Losada, que lembrou que a Dirección Xeral de Tráfico (DXT) porá en marcha a campaña especial para controlar o seu uso este luns.
En concreto, Javier Losada explicou que os axentes da Agrupación de Tráfico da Garda Civil e as policías locais que se sumen á iniciativa intensificarán os controis para comprobar a utilización do cinto de seguridade por parte dos condutores e os ocupantes dos vehículos, tal e como trasladou a Delegación do Goberno en Galicia.
Tamén verificarán se os menores viaxan cos sistemas de retención infantil (SRI) adecuados á súa estatura, o seu peso e a súa idade. Ademais, convidouse aos concellos a adherirse á campaña, que se desenvolverá durante o próximos sete días.
Segundo o balance de sinistralidade de 2020, oito dos 37 falecidos en accidentes de tráfico que viaxaban en turismos e furgonetas non realizaban un uso adecuado dos dispositivos de seguridade no momento do accidente. Así mesmo, dúas das vítimas perderon a vida en vías urbanas.
Precisamente, durante o pasado ano a Agrupación de Tráfico da Garda Civil impuxo 6.427 sancións en Galicia a ocupantes de vehículos por non utilizar cinto de seguridade. Esta cifra representa un dato lixeiramente inferior ao de 2019, aínda que Javier Losada recalcou que resulta "o suficientemente elevado como para preocupar" debido a que en 2020 producíronse "descensos de ata o 30% na circulación en Galicia por mor das restricións".
No marco da campaña especial desenvolvida entre o 9 e o 15 de marzo de 2020, os axentes controlaron en Galicia 42.565 vehículos. Deste xeito, detectaron 710 infraccións de condutores e pasaxeiros que non utilizaban o cinto de seguridade ou o sistema de retención infantil, cuxo uso reduce á metade o risco de morte en caso de accidente, segundo a DXT.
Por tipo de vehículo, un 85,6% dos vehículos alcanzados nos dispositivos corresponderon a turismos, 36.470, que rexistraron un 78,9% das denuncias, 560. Os vehículos de transporte de mercadorías foron a segunda clase á que se realizaron máis controis, 4.188, e acumularon 147 denuncias.
