A metade dos dependentes maiores de 65 anos non están cubertos pola lei galega

As prestacións da Lei de Dependencia de Galicia (Lapad) cobren as necesidades da metade dos dependentes galegos (51%) maiores de 65 anos, segundo un informe do Consello Económico e Social de Galicia (CES) que, aínda que destacou "os avances e esforzos da Administración pública nesta materia", recoñece que "aínda hai moitos aspectos a mellorar".

Estes datos sobre a dependencia e o coidado dos maiores recóllense no informe 'O sistema de coidados de longa duración en Galicia desde a perspectiva da prestación de servizos e creación de emprego', presentado esta mañá na sede do CES en Santiago de Compostela polo seu presidente, Agustín Hernández, e os responsables do estudo e docentes na Universidade da Coruña, Raquel Martínez Buján e Paolo Rungo.

"O obxectivo é que o informe sexa útil para a sociedade galega, que sexa un punto de partida para mellorar, polo que lle trasladaremos o estudo e as súas conclusións ao Goberno autonómico", indicou o presidente do CES sobre un estudo que naceu co obxectivo de "avaliar o sistema de coidados das persoas maiores dependentes desde a implementación da Lapad.

"Aínda que os datos reflicten que a administración pública fixo un gran esforzo e percíbese melloría, hai aspectos que corrixir. É necesario actualizar o modelo de coidados porque, datos como o aumento da esperanza de vida, provocan unha tensión no sistema actual", explicou Martínez Buján Para a responsable do informe, a atención á dependencia "é o desafío máis relevante" do noso tempo.

En Galicia, segundo indica o estudo, máis de 120.000 persoas son dependentes, 117.875 viven nos seus propios fogares e un 77% deles son maiores de 65 anos.

Atendendo ás estatísticas de esperanza de vida e de natalidade, o CES predí que "o crecemento da poboación dependente con dereito a prestación alcanzaría, de media, as 1.780 persoas ao ano, ata chegar a pouco menos de 140.000 no ano 2035", sendo necesarios entre 4.000 e 5.000 postos de traballo máis.

UN SECTOR ALTAMENTE PRECARIZADO E FEMINIZADO

Outro dos problemas que, segundo o estudo do Consello Económico e Social presenta o sistema de coidados galego é a "alta precarización e feminización" destas tarefas. O CES sinala que o 66,5% das persoas con dependencia recibe coidados unicamente da familia.

Nos núcleos familiares, ademais, o 62,8% das coidadoras son mulleres, cunha media, á semana, de 43 horas de coidados, que levan desempeñando, de media, "uns oito anos".

"Unha de cada 3 mulleres recoñeceu ademais que, nalgún momento, reduciu o seu traballo para facerse cargo do coidado dun dependente", recalcou Martínez Buján.

A temporalidade, segundo destacou Rungo, tamén é maior neste sector, onde os contratos deste tipo alcanzan o 35%, mentres que a taxa xeral en Galicia atópase no 25%.ta un 1,5% do PIB os fondos para dependencia".