Feijóo sobre o sketch machista de Land Rober da TVG: "Estivo francamente desacertado"

"Estivo francamente desacertado". Deste xeito valorou o presidente galego a emisión dun sketch no programa Land Rober da TVG que foi considerado como machista por obrigar a unha moza a ter que falar coa súa exparella. Unha insistencia da que fixo gala o seu presentador Roberto Vilar.

En todo caso, Alberto Núñez Feijóo lembrou que Vilar desculpouse polo acontecido, "algo que lle honra" porque, insistiu, "hai outras actitudes machistas de xornalistas, políticos ou actores que non se desculpan". "É evidente que cando quen é responsable do que di e fai, e tamén lle honra cando se desculpa", argumentou na rolda de prensa posterior ao Consello da Xunta.

No programa de Roberto Vilar unha moza foi exposta a un encontro non desexado coa súa exparella que a controlaba. Na entrevista previa que o presentador lle realizou no exterior do estudio, o mozo recoñeceu que a ruptura se produciu polos seus "ciumes" e que a muller xa lle manifestou anteriormente que non quería regresar con el.

Tras a polémica xurdida escasearon os dirixentes populares que condenaron o acontecido, que logo saíron case en conxunto a denunciar unhas declaracións machistas do presidente da Deputación de Lugo, José Tomé, polo xeito de vestir da deputada Elena Candia.