Chamada para vacinarse a 180.000 galegos esta semana tras administrar 33.000 doses desde o venres
En total, completaron a pauta 247.738 galegos desde o venres, é dicir, 3.736 máis.
- A área sanitaria de Santiago detecta un positivo en Ribeira mentres a de Pontevedra detectou outro en Cambados
- Feijóo: "Galicia está a piques de sortear a cuarta onda"
Por Europa Press / Redacción | Santiago de Compostela | 26/04/2021 | Actualizada ás 16:34
O presidente da Xunta, Alberto Núñez Feijóo, avanzou que o Sergas citará esta semana a 180.000 galegos para concretar lugar e hora onde recibirán a súa primeira ou segunda dose da vacina que lle corresponde pola súa franxa de idade.
Esta semana, Galicia recibirá a 105.000 vacinas de Pfizer que cada luns están comprometidas --aínda que puntualmente subiu esta cifra e vén de anunciarse unha nova remesa de 1,7 millóns--, 14.500 de Moderna e unhas 6.000 de Astrazeneca. A elas, hai que sumar unhas 14.000 de Janssen a mediados de semana.
Desde o venres, o Sergas administrou 33.824 doses, das cales 24.735 son dunha primeira inxección e 9.089 cunha segunda, isto segundo a comparativa dos datos difundidos o venres polo Ministerio de Sanidade --con vacinados ata o xoves-- e a información que colgou na páxina web este luns a Consellería de Sanidade.
Os datos da Xunta publicados este luns apuntan que se puxeron 985.996 vacinas, o que sitúa a porcentaxe de administradas sobre recibidas no 93,7 por cento --esperábase alcanzar ao finalizar a semana un 96 por cento--. O informe do Ministerio de Sanidade sinala que con datos do xoves administráronse 952.172 vacinas, polo que no últimos tres días recibiron unha picada 33.824 galegos, dos cales 24.735 fixérono por primeira vez.
O 31,2 POR CENTO DA POBOACIÓN, CON POLO MENOS UNHA PICADA
Ademais, completaron a pauta 247.738 galegos desde o venres, é dicir, 3.736 máis. E o número de persoas con polo menos unha dose alcanzou as 738.258 --das cales 490.520 só teñen unha picada--.
A porcentaxe de poboación diana vacinada a data deste luns, se se teñen en conta os datos da consellería e a poboación obxectivo que inclúe o informe do ministerio revela que ascende ao 10,5 por cento --o venres era do 10,3%--.
Se temos en conta o alcance da inmunización con polo menos unha dose, esta porcentaxe subiu en máis dun punto fronte ao venres e sitúase en 31,2 por cento (fronte ao 30%).
