A Xunta reitera que os desprazamentos con Portugal "deben estar xustificados"

O vicepresidente primeiro da Xunta, Alfonso Rueda, subliñou que a pesar da reapertura das fronteiras entre Portugal e España, Galicia "segue perimetrada e, por tanto, a entrada e saída" da comunidade "ten que ser por causas xustificadas". Así respondeu a preguntas dos xornalistas durante un acto celebrado este luns en Vigo, no que mantivo que, "a día de hoxe, Galicia, igual que case todas as comunidades autónomas, segue perimetrada" o que "inclúe tamén a parte da fronteira con Portugal".

Neste marco, reiterou que a Xunta remitiu unha carta ao ministro do Interior, Fernando Grande-Marlaska, e ao delegado do Goberno en Galicia, "lembrándolles" que "mentres non se levante esa medida" a comunidade mantén o seu peche perimetral, "e por tanto, as causas de desprazamento con Portugal teñen que ser xustificadas".

A maiores, indicou que nesa misiva o Goberno galego pediu a colaboración da Garda Civil e da Policía Nacional para garantir que se cumpran "eses requisitos mentres estean en vigor". "Se queremos ser coherentes, mentres as medidas sigan así deben ser mantidas e respectadas", selou.

Un vehículo diríxese á fronteira entre Portugal e Galicia, a 1 de maio de 2021. Europa Press