O Consello da Cultura impulsa unha edición conmemorativa da única obra narrativa de Xela Arias
En 'Non che amola!', a autora retrata a súa infancia a través de 16 contos de ficción nos que reflicte aos seus seres queridos.
Por E.P. | SANTIAGO DE COMPOSTELA | 04/05/2021 | Actualizada ás 13:47
A obra inédita de Xela Arias, 'Non de amola!', foi editada nunha publicación conmemorativa por parte do Consello da Cultura Galega en homenaxe á autora, editora e docente con motivo do Día das Letras Galegas.
Esta peza representa a única obra narrativa de Arias, máis coñecida pola súa faceta poética e o seu traballo no mundo da tradución. O texto componse dun total de 16 contos escritos a principios dos 90, cando a autora contaba con preto de 30 anos de idade. Neles, Xela Arias ofrece un retrato á súa infancia e se retrotrae ata o nove anos, para relatar as vivencias do día a día e da súa propia familia.
A obra estaba finalizada e revisada pola propia escritora, que mesmo contaba cunha subvención concedida pola entón Consellería de Cultura e Xuventude para a súa edición. A pesar diso, optou por deixar o libro no ámbito familiar, renunciou á axuda e conservouno á espera do momento oportuno.
A decisión da Real Academia Galega de recoñecer a figura de Arias nas conmemoracións do 17 de maio, levou á súa familia a propor a difusión e publicación desta proposta narrativa inédita, que o Consello da Cultura asumiu como parte da súa liña de edicións conmemorativas daqueles autores aos que se dedican as Letras Galegas.
A publicación, que conta cunha tirada limitada de 500 exemplares, conta cun estudo introductorio a cargo de Ana Iglesias, profesora e amiga persoal de Xela Arias, ademais de sete ilustracións realizadas por Bea Gregores. Ambas participaron este martes en Santiago de Compostela na presentación desta edición, xunto co fillo de Arias, Darío Gil, e a presidenta do CCG, Rosario Álvarez.
