A CIG denuncia condicións de "extrema penosidade" para os traballadores do Parque Nacional Illas Atlánticas

A CIG denunciou que os traballadores do Parque Nacional Illas Atlánticas padecen condicións laborais de "extrema penosidade" con "máis do dobre do máximo legal" de horas extraordinarias "sen retribuír".

A central nacionalista asegura que os empregados afrontan "condicións laborais singulares" que os obrigan a permanecer nas illas durante semanas completas.

Así, sostén que padecen situacións de "soidade e insularidade extrema" en lugares con "colchóns compartidos e en malas condicións" e "falta de auga potable", entre outras cuestións.

"Todas son realidades pouco compatibles coa idea de traballar nun paraíso natural", engade a CIG, que advirte que as avaliacións de riscos laborais "están obsoletas despois de anos agochadas".