O PSdeG acusa a Xunta de "falsear información" e impedir unha solución en Thenaisie

O deputado socialista Julio Torrado presentou unha batería de iniciativas parlamentarias para esixirlle á Xunta unha "solución definitiva e estable" para Thenaisie Provote --Fábrica de Rons--.

Torrado acusa o Goberno galego de "falsear información en sede parlamentaria" sobre a situación da factoría e de renunciar a traballar nunha solución que "defenda todo o colectivo de traballadores".

O responsable socialista acusa a Xunta de negarse a compartir a información sobre "o interese dalgunha empresa que puidese ter ambición de facerse coa firma, pero reducindo un gran volume de traballadores". "Agochou a existencia deste intercambio empresarial, prexudicial para o persoal, validando e servindo de aval para esta operación", agrega.

Torrado engade que "a Xunta mostrou ser incapaz de resolver a situación, evidenciando que apostaron por favorecer unha empresa concreta que entrara na solución, pero que terminou por retirar a súa oferta".

En conclusión, "a Administración autonómica dificultou todas as posibilidades de atopar unha solución, pero tampouco conseguiu ningunha que fose viable".

Reprocha ao Goberno galego abandonar os traballadores da conserveira, que ten no Grove a nave conserveira e en Mos a central operativa e de loxística, para "admitir sumisamente os criterios de especulación empresarial que veu xogando cos postos de traballo".