A Xunta avanza que a inmunidade de grupo pode estar en "dous meses"
O Sergas inxectará 230.000 doses esta semana, tras chegar unha das grandes remesas de doses de vacinas.
Por Europa Press / Redacción | Compostela | 31/05/2021 | Actualizada ás 14:35
O inicio do mes de xuño traerá a Galicia, como xa estaba previsto, unha das grandes remesas de doses das vacinas, sobre todo, de Pfizer, o que permitirá avanzar coa inmunización da poboación co obxectivo de en "en dous meses" conseguir a esperada inmunidade de rabaño, un dos escenarios cos que traballa a Consellería de Sanidade, que esta semana programa 230.000 inoculacións.
Ademais, esta semana chegarán 75.000 dose de Astrazeneca, o que, segundo manifestou o conselleiro de Sanidade, Julio García Comesaña, garante a subministración para todos aqueles menores de 60 anos que recibiron unha primeira dose e opten por repetir a mesma marca.
Coa metade da poboación galega con polo menos unha dose inoculada, Galicia dará un puxo esta semana á vacinación, e a administración de 230.000 doses, coas que, como confirmou o presidente da Xunta, Alberto Núñez Feijóo, nun acto institucional sobre turismo en Vigo, "Galicia apura a inmunización dos grupos de idade".
Desta forma, como se avanzou nos últimos días, esta semana acabará a inmunización do grupo de 50 a 59 anos e, a partir do 7 de xuño, comezará a administración da vacina para o colectivo de 40 a 49, para os que está planificada a vacina de Pfizer ou Moderna --que esta semana experimenta un novo atraso a subministración--.
"FINAL DO TÚNEL"
"Co avance da vacinación estamos a ver, esta vez si, o final do túnel", proclamou Feijóo no acto de Vigo, no que lembrou que preto do 28 por cento da poboación galega xa completou a pauta de vacinación.
DOUS MESES
García Comesaña expuxo que se traballa "con distintos escenarios", pero indicou que "non antes dun par de meses" alcanzarase o "obxectivo" de chegar á inmunización de rabaño. "Cando teñamos a previsión, máis ou menos axustada, trasladarémola", subliñou.
Ademais, preguntado pola posta en marcha dun sistema de cita previa para axustar a vacinación, lembrou que será para os menores de 40 anos. Sería "un sistema que combine a citación masiva organizada por parte da consellería cunha apertura de ocos de citación para aquelas persoas que por motivos laborais ou de educación queiran adiantar o seu proceso".
En canto aos menores de 12 e 16 anos, a falta de que se avalíen no consello interterritorial, sostivo que, se se segue a lóxica actual, colocaranse a final do grupo de idade anterior. "Se non hai novidade, cando corresponde, ao final dos grupos en vigor", dixo, aínda que precisou que haberá que "axustarse" á situación específica.
