A Xunta ve "improvisada" a política enerxética do Goberno e afirma que pon en risco empregos
Por E.P. | SANTIAGO DE COMPOSTELA | 01/06/2021 | Actualizada ás 11:50
O vicepresidente segundo e conselleiro de Economía, Francisco Conde, reprochou ao Goberno estar a levar a cabo unha transición enerxética "desordenada" e "improvisada", ao ser preguntado polos novos prezos da luz coincidindo coa súa asistencia a unha xornada organizada polo Club Empresarial e Executivo de Galicia.
"Non cumpre o obxectivo que temos establecido dentro da nosa economía, que as empresas poidan acceder a un prezo competitivo e que os consumidores non paguen no recibo da luz o custo desta transición enerxética", expuxo.
Ademais, considerou que as medidas do Goberno "poñen en risco empregos" en Galicia. "Hoxe constátase que esa transición enerxética está a xerar un custo adicional aos consumidores no prezo da factura e falta de competitividade das nosas industrias".
"Non só das empresas electrointensivas, que non conseguiron que a través do estatuto electrointensivo puidesen ter un prezo equiparable á Unión Europea, senón que o tecido produtivo asume un custo máis elevado", recalcou.
Todo iso vinculouno a "unha mala política" e a unha política enerxética "improvisada" por parte do Executivo. "Esperamos que se poida rectificar", dixo o conselleiro, para quen "a aposta polas renovables" non a deben pagar "nin os consumidores nin as propias empresas".
