Pontevedra súmase ás protestas estatais contra o "colapso" da sanidade pública

Preto dun centenar de persoas concentráronse na Praza da Peregrina de Pontevedra para esixir a derrogación da Lei 15/97 e o artigo 90 da Lei Xeral de Sanidade á que atribúen "o colapso do sistema sanitario público", como resultado de "décadas de infrafinanciación", tal e como criticou María Ferreiro, do Sindicato de Profesionais da Sanidade Galega Pública (PROSAGAP).

Esta organización, xunto coa Confederación Xeral do Traballo (CXT) de Galicia e o Sindicato de Traballadores e Traballadoras do Ensino de Galicia (STEG), secundaron novamente --catro meses despois da última convocatoria-- a mobilización impulsada pola Coordinadora Antiprivatización da Sanidade (CAS) a nivel estatal, nunhas 60 cidades.

María Ferreiro alertou sobre a "escaseza" de persoal despois de que moitos profesionais que sentiron "maltratados" polas condicións laborais nas que traballan e a eventualidade dos contratos, fuxisen " a outras comunidades e países". Así, a falta de efectivos e a "xestión desastrosa" dos últimos anos son os motivos, segundo a portavoz de PROSAGAP, das listas de espera nos hospitais e de que a actividade sanitaria estea "en risco".

Por iso, asegurou que é "imprescindible blindar a sanidade de calquera interese privado", ademais de "investir nunha sanidade pública que ofreza un servizo universal e gratuíto, non mercantilista e de calidade". Tamén defendeu a atención primaria e que se recupere "a prevención e a promoción da saúde" para mellorar a asistencia, tendo en conta as "desigualdades" sociais existentes na actualidade.

"A saúde non é un negocio, senón unha prioridade para calquera sociedade", insistiu María Ferreiro, ao reclamar "o rescate de todo o privatizado" e a posta en marcha dunha "industria sanitaria e farmacéutica pública".

PANDEMIA

Precisamente, o secretario xeral da CXT en Pontevedra, Miguel Anxo Cuña, cualificou de "escándalo internacional o negocio das vacinas" como "exemplo extremo" da lexislación sanitaria que propiciou a privatización de "máis áreas, servizos e instalacións sanitarias cando máis necesarias eran, aproveitando a emerxencia dramática" da pandemia de COVID e o "desconcerto xeral" da sociedade ante esta situación.

Ademais, Cuña denunciou que, para "colmo do despropósito", dos fondos europeos extraordinarios dotados con 72.000 millóns de euros para a recuperación económica, "só o 1,4 por cento se destinarán á sanidade". Para o portavoz da CXT, esta repartición "esconde de novo a perversión de ofrecer diñeiro ás grandes corporacións e armazóns financeiras".

Pola súa banda, a portavoz do STEG, Purificación Quinteiro, lamentou que a COVID mostrou a "crúa realidade da canibalización do estado social". Por iso, destacou que "a mensaxe que nos debería deixar a pandemia é a necesidade de crear un modelo económico e social baseado nuns bos servizos públicos, gratuítos e de calidade"

Así, precisou que urxe "reformular o modelo dos servizos públicos que integre o social, o ambiental e a equidade para avanzar cara a unha sociedade inclusiva", argumentando que "a sanidade, a educación e as pensións non se poden deixar en mans do sector privado". "Asumilo", engadiu, levaría "que eses dereitos fundamentais son só para quen os pode pagar, o que xera unha enorme desigualdade".

Concentración en Pontevedra en defensa da sanidade pública | Fonte: Europa Press