O software libre galego seguiu medrando a pesar da pandemia

A nivel económico, a pandemia puxo en claro a debilidade da que adoece boa parte dos sistemas produtivos de Galicia e o resto do Estado. O cerne desa febleza estaba, claro, no turismo: actividade de baixo valor engadido e necesariamente presencial, circunstancia que á chegada das restricións púxollo moi difícil a moitos á hora de cadras as contas de cada mes.

En troques, o sector servizos de alto valor engadido segue medrando sen teito visible. Tal é o caso que se desprende da derradeira asemblea celebrada pola Asociación de Empresas Galegas de Software Libre (Agasol), plataforma que recolle á meirande parte de empresas dedicadas á produción deste software en Galicia e que vén de pechar o ano pandémico con resultado “positivo”. 

Así é que, segundo apuntan nun comunicado, a Agasol rematou o exercicio de 2020 sen débedas, circunstancia que, a ollos da propia plataforma, debe ser tida en conta como “aínda máis destacable” debido a esa conxuntura de dificultades que rematou por botar abaixo moitos negocios de diversos sectores. 

Á parte desta constatación, o encontro da asociación serviu para renovar boa parte da cúpula directiva e lanzar unha serie de perspectivas de futuro para esta asociación que recolle unha trintena de empresas, entre elas “grandes referentes dentro e fóra de Galicia e de España”. E é que, segundo apuntan na asociación, as empresas asociadas a Agasol “teñen negocio en 18 países de catro continentes”, nos que se contan mercados tan “consolidados” como EE. UU., Alemaña, Xapón, Corea do Sur ou Finlandia.