A CRTVG emitirá os partidos finais da 'Champions' de fútbol gaélico
O acordo para os dereitos de transmisión foi anunciado pola Asociación Galega de Fútbol Gaélico, facéndose eco na propia prensa de Irlanda.
Por Galicia Confidencial | SANTIAGO DE COMPOSTELA | 08/07/2021 | Actualizada ás 22:30
A elite do fútbol gaélico xoga na TVG. O ente público galego vén de mercar os dereitos para emitir as semifinais e final do campionato All - Ireland, que se celebrará o vindeiro mes de agosto e está considerado como o máximo torneo deste deporte polos seus adeptos, que dende os últimos anos se contan cada vez máis en Galicia.
A nova foi adiantada polo Irish Examiner, que vencella a compra dos dereitos de emisión do All - Ireland á “suba” de popularidade deste deporte dentro das fronteiras galegas; en particular despois de que na década pasada se conformaran os primeiros equipos galegos desta disciplina: Coruña Fillos de Breogán e Estrela Vermelha.
As emisións desenvolverase o 14, 15 e 29 de agosto, segundo confirmou a Asociación Galega de Fútbol Gaélico, que apuntou na súa conta de Twitter o seu entusiasmo ante unha retransmisión que “vai permitir ao público galego coñecer como é o fútbol gaélico de máximo nivel”.
Como nota para entender a magnitude do evento dicir que na última edición previa á pandemia 85.000 siareiros encheron as bancadas de Croke Park na final All- Ireland case 20.000 mais que a final da Champions league de fútbol dese mesmo ano. pic.twitter.com/AYba8bTYZW
— Gaélico Galego (@GaelicoGalego) July 5, 2021
"VENCELLO CELTA"
Dende o Examiner amósanse curiosos ante a paulatina implantación deste deporte en Galicia. Na nova que recolle o caso dos dereitos de retransmisión tamén fan referencia á liga de fútbol gaélico desenvolta en Galicia e que comeza en cada mes de outubro enfrontando a un total de nove equipos. “Crese que a histórica conexión celta entre Irlanda e Galicia está detrás do interese que alí teñen polo xogo”, apuntan os irlandeses.
