A Xunta di que manerá as actividades de lecer antes de tomar medidas "máis drásticas"

O vicepresidente primeiro da Xunta, Alfonso Rueda, aposta por compatibilizar o lecer e as medidas sanitarias para facer fronte aos contaxios de covid, de modo que asegura que o Goberno galego fará "todo o posible" antes de adoptar decisións "máis drásticas".

Así o dixo no 'Foro Turismo' de Europa Press, onde apuntou a medidas "alternativas" como as PCR para non ter que pechar o lecer nocturno en zonas con peores datos epidemiolóxicos. O vicepresidente primeiro da Xunta asegurou que a administración autonómica está "a tentar tomar as medidas para facerlle fronte" aos contaxios, centrados agora na xente nova. 

O Vicepresidente Primeiro da Xunta de Galicia, Alfonso Rueda (i), conversa xunto á directora de Desenvolvemento de Negocio de Europa Press, Candeas Martín de Cabiedes Arranz (d), no Foro Turismo de Europa Press. Marta Fernández Xara - Europa Press | Fonte: Europa Press

"A situación sanitaria é o principal", advertiu, antes de engadir que, en calquera caso, o executivo galego "vai tentar compatibilizar as dúas cousas ata onde se poida". Así, lembrou que Galicia non pechou o lecer nocturno e, "dado que a coordinación (por parte do Goberno central) nin está nin se lle espera".

"SE FAI FALTA MÁIS AMODO, MÁIS AMODO"

"Se fai falta máis amodo, máis amodo. Pero volver atrás é demoledor", avisou, en alusión a razóns económicas e tamén de ánimo. "A nosa intención é, se podemos, manter toda a actividade turística e de lecer, pero se é necesario tomas medidas máis drásticas tamén o faremos. Pero faremos todo o posible antes de ir a medidas máis drásticas", subliñou.

Rueda avoga por "esas medidas alternativas para tentar compatibilizar" o lecer coa saúde, e indicou que os empresarios do lecer nocturno apoiaron a solicitude de PCR para acceder a locais en zonas con máis incidencia de coronavirus.

Cos concertos, dixo a preguntas sobre O Son do Camiño no seu formato reducido este ano, "faríase o mesmo". "Antes de ter que suspender concertos (...) imos tentar mantelos con todas as medidas se fose necesario", resaltou, en referencia a reducións de aforamento ou "medidas alternativas".

ACTIVADO O SEGURO CORONAVIRUS

Por outra banda, informou de que o seguro fronte ao coronavirus habilitado pola Xunta para peregrinos e turistas en xeral xa foi activado en "algún caso puntual". Foron "moi poucas" ocasións, segundo apuntou sen concretar o número, para "o volume enorme" de visitantes que está a recibir Galicia nas últimas semanas. E nos "pouquísimos casos que houbo que activalo está a funcionar con normalidade", defendeu.