O PP da Coruña celebrará o seu congreso provincial o 25 de setiembre
Diego Calvo traslada a súa disposición para "seguir traballando" e anuncia que se presentará á reelección.
Por Europa Press / Redacción | SANTIAGO DE COMPOSTELA | 19/07/2021 | Actualizada ás 20:41
O Congreso Provincial do PP da Coruña celebrarase o próximo 25 de setiembre, tal e como se aprobou este luns na xunta directiva provincial reunida na cidade herculina baixo a presidencia de Diego Calvo e coa asistencia, entre outros, do secretario xeral do PPdeG, Miguel Tellado.
A cita, á que poderán presentarse candidaturas ata o día 3 de agosto, terá lugar despois da celebración do congreso rexional este fin de semana, no que Alberto Núñez Feijóo revalidou a confianza dos afiliados.
O exalcalde de Ferrol José Manuel Rey Varela e a conselleira de Política Social, Fabiola García, serán os responsables das comunicacións que se presentarán ao congreso provincial. A do portavoz do PP ferrolán versará sobre os novos retos para o municipalismo e a da titular de Política Social centrarase nos servizos públicos.
"Está claro que somos un partido forte, unido e cos obxectivos de traballo moi claros, centrados nas próximas eleccións municipais do 2023 e nas xerais de 2024", destacou Diego Calvo, que engadiu que o PP coruñés está "obrigado" a recuperar as alcaldías, "que nunca deberon perderse nas eleccións de 2019 e volver gobernar a Deputación da Coruña".
Coa vista posta nestas citas electorais, Calvo anunciou a súa disposición a seguir á fronte da organización provincial outros catro anos. "Falei estes últimos días con moitos afiliados e cos responsables municipais da maior parte da provincia e, se a militancia así o quere, estou a disposición para seguir traballando como ata agora polo noso partido", asegurou.
Na súa intervención, mostrou o seu convencemento de que o PP é o partido que "máis se parece aos coruñeses" e a "única formación política capaz de dar resposta plural ás necesidades plurais dos coruñeses".
"Empezamos no 2016 un traballo moi importante, renovando e consolidando as nosas estruturas locais, e nas últimas eleccións autonómicas conseguimos un resultado histórico, o mellor da nosa provincia ata o momento conseguindo 14 deputados autonómicos", sostivo Calvo, que animou aos responsables municipais a "dar o mellor de si" para recuperar os gobernos locais.
Neste sentido, marcouse como reto "blindar" aos alcaldes do PP revalidando as maiorías absolutas e gañar tamén en moitos municipios nos que non gobernan por "moi poucos votos".
Ademais, en referencia ao congreso autonómico celebrado esta fin de semana, considerou que "quedou claro que o PP, todo o PP de España, traballa na mesma dirección", "que non é outra que dar resposta ás necesidades dos cidadáns". "Iso é o que faremos tamén na provincia da Coruña", apuntou.
REACTIVACIÓN ECONÓMICA
Ademais, o presidente provincial incidiu en que o traballo dos próximos anos terá que centrarse na reactivación económica pospandemia, algo que "nos concellos ten que ser fundamental".
Por último, insistiu no carácter aberto e integrador do PP da Coruña, onde teñen cabida "todas aquelas persoas que queiran facer algo por mellorar a vida dos seus veciños".
