As sete áreas sanitarias galegas realizan 18 intervencións con apoio dos robots Da Vinci
O xefe de Uroloxía da área Sanitaira de Ferrol, Andrés Rodríguez Alonso, explicou que este sistema robotizado "permite evitar perda de sangue" nas intervencións
Por Europa Press / Redacción | SANTIAGO DE COMPOSTELA | 23/07/2021 | Actualizada ás 17:33
As sete áreas sanitarias galegas realizaron 18 intervencións cirúrxicas con apoio da cirurxía robotizada cos robots Da Vinci, cos que fixeron extirpacións totais da próstata en pacientes con cancro nesta glándula.
Así o explicaron este venres en rolda de prensa o conselleiro de Sanidade, Julio García Comesaña, e o director xeral de Asistencia Sanitaria, Jorge Aboal, xunto a representantes das áreas sanitarias galegas.
Comesaña destacou o "salto de calidade" experimentado polo sistema sanitario público galego tras a xeneralización do uso da cirurxía robotizada despois de que nesta semana as sete áreas sanitarias do Sergas completasen "con éxito" as súas primeiras intervencións cirúrxicas co apoio dos robots Da Vinci adquiridos este ano pola Xunta.
En concreto, as intervencións foron prostatectomías radicais, que consisten en extirpacións totais da próstata en 18 pacientes con cancro nesta glándula". En concreto, o pasado martes operouse a nove pacientes e o mércores a outros nove.
O conselleiro agradeceu o seu labor a todos os implicados no proceso e destacou o "salto de calidade" do sistema sanitario público coa cirurxía robotizada.
Pola súa banda, o xefe de Uroloxía da área Sanitaira de Ferrol, Andrés Rodríguez Alonso, que falou en nome dos servizos do resto de distritos, explicou o proceso e destacou a "enorme ilusión e a enorme implicación" de todos os equipos, desde celadores a anestesistas, entre outros.
FORMACIÓN
Así mesmo, indicou que, entre outras cuestións, este sistema robotizado "permite evitar perda de sangue" nas intervencións. Deste xeito, puxo en valor "as enormes vantaxes" do Da Vinci, robots que só poden ser usados "por cirurxiáns especialistas na materia e formados".
De feito, lembraron por parte de Sanidade que os equipos de Uroloxía dos sete hospitais do Sergas recibiron formación entre o 6 e 15 de xullo e traballaron con especialistas de hospitais do resto do Estado familiarizados con esta tecnoloxía.
