O CES alerta do "repunte" da pobreza e urxe políticas expansivas e reforzar a Atención Primaria
Avisa na súa memoria de 2020 de perda de converxencia coa UE e dunha "mala evolución" en todos os sectores coa pandemia.
Por Europa Press / Redacción | SANTIAGO DE COMPOSTELA | 27/07/2021 | Actualizada ás 15:01
O Consello Económico e Social (CES) alerta do "repunte" da pobreza e das desigualdades sociais debido ao impacto da pandemia en Galicia, "especialmente" entre mozas, mulleres e persoas inmigrantes. Por iso, demanda unha maior cobertura nas axudas e urxe políticas expansivas de recuperación.
Esta é unha das conclusións que se recollen na memoria do CES de 2020 --aprobada por unanimidade na última sesión plenaria do organismo--, que este martes entregou o presidente da entidade, Agustín Hernández, ao titular do Parlamento galego, Miguel Santalices.
Así, o CES recolle o "forte impacto na economía" da crise do coronavirus, "con consecuencias tanto na destrución do tecido produtivo como no aumento do desemprego e da desigualdade social ou a deterioración das contas públicas".
De feito, expón que os avances logrados na converxencia de Galicia coa Unión Europea "perdéronse coa crise económica", polo que demanda medidas para "reverter esta tendencia".
Nesta liña, manifesta a súa preocupación sobre "a mala evolución de todos os sectores da economía galega", "en especial", no sector industrial e comercio. Cre necesario axilizar instrumentos orzamentarios para a súa reactivación.
E é que se identifica un "forte impacto" no mercado laboral, cun "importante axuste" de emprego sobre os máis vulnerables. Apela a implementar políticas para atallar o desemprego xuvenil e para apoiar aos autónomos.
A isto únese que se agravaron problemáticas como o envellecemento. Tamén apunta que "especialmente grave é a perda de poboación activa feminina, xa que o descenso non só se debe a problemas estritamente laborais, senón tamén ás dificultades de conciliación, feito que a pandemia evidenciou extremadamente".
FONDOS EUROPEOS
Unha das cuestións sobre as que pon o foco é a de aproveitar "eficientemente" os fondos europeos Next Generation para a recuperación.
Nesta liña, avógase por mellorar "a resiliencia" da economía galega para impulsar a transformación dixital e ecolóxica, á vez que se mellora a súa innovación e produtividade.
O CES defende que as políticas económicas pospandemia "deben ser áxiles, expansivas e contundentes para poder regresar á senda do crecemento económico e estable". Avoga por que "é o momento de que os poderes públicos desenvolvan estratexias que faciliten a cohesión social e territorial de Galicia".
REFORZAR ATENCIÓN PRIMARIA
Na análise da situación sanitaria, unha das maiores preocupacións do CES é que o "orzamento da Atención Primaria apenas aumenta con respecto ao comezo da crise económica de 2008". Por iso, "débese cambiar esta tendencia", pois debe ser "prioritaria" a súa mellora.
Ademais, pide "redeseñar" a asistencia sanitaria con "especial atención" ao coidado de persoas maiores e dependentes. Reclama un "esforzo extra" para diminuír as listas de espera en atención especializada.
Xunto a isto, resalta que os problemas de saúde mental "víronse agravados" co impacto da covid, por requíreo atención ao Plan Galego de Saúde Mental. Paralelamente, chama a apostar pola innovación e investigación sanitaria.
